रास्वपा सभापति लामिछाने र भारतीय गृहमन्त्री अमित शाहबीच आज भेटवार्ता हुँदै
काठमाडौं । भारतीय जनता पार्टी (भाजपा) को निमन्त्रणामा भारत भ्रमणमा रहेको राष्ट्रिय स्वतन्त्र पार्टी (रास्वपा) का सभापति रवि लामिछाने नेतृत्वको प्रतिनिधिमण्डलले आज भारतका गृहमन्त्री अमित शाहसँग भेटवार्ता गर्दैछ।
नयाँ दिल्लीमा हुने उक्त उच्चस्तरीय भेटवार्तामा नेपाल-भारत सम्बन्ध र आपसी हितका विविध आयामहरूमा छलफल हुने कार्यक्रम रहेको छ।
विशेष गरी दुई देशबीचको सुरक्षा सहकार्य, लोकतान्त्रिक अभ्यास, राजनीतिक दलहरूबीचको संवाद तथा पारस्परिक सहकार्यका विषयमा गहन विचार विमर्श हुने अपेक्षा गरिएको छ।
यसअघि मंगलबार सभापति लामिछानेले भाजपा मुख्यालय पुगेर नेता नितिन नवीन लगायतका शीर्ष नेताहरूसँग भेटघाट गरिसकेका छन्। राजनीतिक सम्बन्ध विस्तार र अनुभव साझेदारीका लागि भारत भ्रमणमा रहेको रास्वपा टोलीले आज गृह मन्त्रालयमा हुने भेटलाई निकै महत्त्वका साथ हेरेको छ।
