अन्तिम समयमा आएर राज्य ब्यवस्था समितिको बैठक स्थगित
काठमाडौं, २२ जेठ । राज्य व्यवस्था तथा सुशासन समितिको बैठक स्थगित भएको छ ।
आज दिउँसो १ः ०० बजे बस्ने भनिएको बैठक अन्तिम समयमा आएर स्थगित भएको हो । संघीय संसद सचिवालय, सिंहदरवार परिसरमा उक्त बैठक बस्नेवाला थियो ।
आजको बैठकमा अघिल्ला बैठकको निर्णय कार्यान्वयन प्रगति जानकारी सम्बन्धमा छलफल गरिदै थियो भने बिभिन्न उपसमितिहरू पनि गठन गरिने जनाइएको थियो ।
आजको बैठकले बैठक सञ्चालन कार्यविधि तयारी उपसमिति, समितिमा परेका विभिन्न उजुरी अध्ययन उपसमिति, समितिको कार्यक्षेत्र अन्तर्गतका मन्त्रालय एवम् निकायहरूको कामकारवाही अध्ययन एवम् निगरानी उपसमिति गरी तीन उपसमिति गठन हुने कार्यसुची तयार पारेको थियो ।
साथै, समितिको कार्यक्षेत्रमा पर्ने विभिन्न निकायहरूको स्थलगत अनुगमन गर्ने सम्बन्धमा पनि छलफल गरिने जनाइए पनि बैठक नै नबसे पछि पर धकेलिएको छ ।
