प्रहरी हौं भन्दै लुटपाट गर्ने गिरोह पक्राउ, १० लाख ९५ हजार रुपैयाँ लुटिएको खुलासा
काठमाडौं । आफूलाई प्रहरी भएको भन्दै डर–त्रास देखाएर नगद तथा अन्य सामग्री लुटपाट गर्ने घटनामा संलग्न चार जनालाई प्रहरीले पक्राउ गरेको छ।
जिल्ला प्रहरी परिसर काठमाडौंका अनुसार गत असार ९ गते बेलुका करिब ७ बजे काठमाडौं महानगरपालिका–१६ वनस्थलीमा डेरा गरी बस्दै आएका ४६ वर्षीय शेरबहादुर मोक्तानको कोठामा घटना भएको थियो।
प्रहरीका अनुसार सिन्धुलीको घ्याङलेख गाउँपालिका–५ घर भएका धनबहादुर मोक्तान जग्गा खरिदको सिलसिलामा काठमाडौं आएका बेला ५/६ जनाको समूहमा पुगेका व्यक्तिहरूले आफूहरू प्रहरी भएको भन्दै डर, त्रास र धम्की दिएका थिए। उनीहरूले धनबहादुरलाई नियन्त्रणमा लिएर हतकडीसमेत लगाई उनको साथमा रहेको १० लाख ९५ हजार रुपैयाँ नगद, मोबाइल फोन तथा सिद्धार्थ बैंकका खाली चेकहरू लुटेर फरार भएका थिए।
घटनापछि फरार आरोपितहरूको खोजतलासका क्रममा प्रहरीले असार १४ गते काठमाडौंका विभिन्न स्थानबाट चार जनालाई पक्राउ गरेको हो। पक्राउ पर्नेमा सिन्धुपाल्चोक त्रिपुरासुन्दरी गाउँपालिका–३ घर भई धापासी बस्दै आएका ४३ वर्षीय रामशरण दमाई, काठमाडौं टोखा नगरपालिका–१ का ३८ वर्षीय सविन खवास, पर्साको ठोरी गाउँपालिका–४ घर भई हाल गौरीघाट बस्दै आएकी ४३ वर्षीया लक्ष्मी गोले र सिन्धुली घ्याङलेख गाउँपालिका–५ घर भई वनस्थली बस्दै आएका ४६ वर्षीय शेरबहादुर मोक्तान रहेका छन्।
प्रहरीले आरोपितहरूको साथबाट एक हजार दरका २०० थान नेपाली नोट अर्थात् २ लाख रुपैयाँ बरामद गरेको जनाएको छ।
पक्राउ परेकामाथि चोरी तथा डाँका सम्बन्धी कसुरमा काठमाडौं जिल्ला अदालतबाट सात दिनको म्याद थप अनुमति लिई प्रहरी वृत्त बालाजुले थप अनुसन्धान गरिरहेको छ।
