कोशीमा लागू औषध सहित ५ जना पक्राउ, ५ किलोभन्दा बढी गाँजा र १०७ ग्राम ब्राउन सुगर बरामद
विराटनगर, असार २९ । कोशी प्रदेश प्रहरीले सञ्चालन गरेको लागू औषधविरुद्धको महाअभियान अन्तर्गत विभिन्न जिल्लाबाट लागू औषध कारोबारमा संलग्न ५ जनालाई पक्राउ गरेको छ।
कोशी प्रदेश प्रहरीका अनुसार पक्राउ परेकाहरूको साथबाट ५ किलो १०५ ग्राम गाँजा र १०७ ग्राम ६०५ मिलिग्राम ब्राउन सुगर बरामद गरिएको छ।
झापाको दमक नगरपालिका–६ बाट इलाका प्रहरी कार्यालय दमकको टोलीले गौरादह नगरपालिका–१ निवासी २६ वर्षीय विशाल राई र उमेश राजवंशीलाई ५६० मिलिग्राम ब्राउन सुगर तथा प्रदेश १–०१–०१८ प ७७०७ नम्बरको मोटरसाइकल सहित पक्राउ गरेको हो।
यस्तै, संखुवासभाको खाँदबारी नगरपालिका–५ निवासी ७० वर्षीय भीमबहादुर तामाङलाई आफ्नै घरमा लुकाइछिपाइ राखिएको ५ किलो १०५ ग्राम गाँजा सहित जिल्ला प्रहरी कार्यालय संखुवासभाले पक्राउ गरेको जनाएको छ।
त्यसैगरी, विशेष सूचनाका आधारमा लागू औषध नियन्त्रण ब्यूरो विराटनगर र इलाका प्रहरी कार्यालय दुहबीबाट खटिएको संयुक्त प्रहरी टोलीले मोरङको धनपालथान गाउँपालिका–१ का २५ वर्षीय जमालउद्दीन मिया र २५ वर्षीय इमदाद मियालाई १०७ ग्राम ४५ मिलिग्राम ब्राउन सुगर सहित नियन्त्रणमा लिएको प्रहरीले जनाएको छ।
पक्राउ परेका सबैविरुद्ध लागू औषधसम्बन्धी कसुरमा आवश्यक अनुसन्धान र कानुनी प्रक्रिया अघि बढाइएको कोशी प्रदेश प्रहरीले जनाएको छ।
