भारतको सहयोगमा सगरमाथाको फेदीमा बनाइदैछ भब्य गुम्बा, गरियो शिलान्यास
काठमाडौं, ३१ असार । भारतको सहयोगमा नेपालको सोलुखुम्बु जिल्लामा एउटा गुम्बाको निर्माण कार्य सुरु भएको छ।
मङ्गलबार लिखु पिके गाउँपालिकामा उक्त गुम्बाको शिलान्यास गरिएको हो ।
सोलुखुम्बुलाई सगरमाथाको प्रवेशद्वारका रूपमा चिनिन्छ। छिमेकी मुलुकमा तल्लो तहको पूर्वाधारको तीव्र विकास गर्ने रणनीतिक पहलअन्तर्गत यो यस जिल्लामा भारतको छैटौँ उच्च प्रभाव सामुदायिक विकास परियोजना हो। भारतले यस गुम्बाको निर्माणका लागि ३ करोड ३० लाख भारतीय रुपैयाँ आर्थिक सहयोग उपलब्ध गराएको छ।
काठमाडौंस्थित भारतीय दूतावासले यस परियोजनासम्बन्धी विवरण उपलब्ध गराएको छ। एक विज्ञप्तिमा उल्लेख गरिएअनुसार मंगलबार लिखु पिके गाउँपालिकाकी अध्यक्ष मीना कार्की बस्नेत र भारतीय दूतावासका द्वितीय सचिव अजय कुमार सिंहले संयुक्त रूपमा उक्त गुम्बाको शिलान्यास गरेका हुन् ।
दूतावासले जनाए अनुसार यो उच्च प्रभाव पार्ने सामुदायिक विकास परियोजना लिखु पिके गाउँपालिकामार्फत कार्यान्वयन गरिनेछ। नेपालको सोलुखुम्बु जिल्लामा सञ्चालन हुन लागेको यो छैटौं परियोजना हो। भारतका यस्ता परियोजनाहरू मुख्यतया नेपाल, श्रीलंका, भुटान र माल्दिभ्सजस्ता निकटतम छिमेकी मुलुकहरूमा कार्यान्वयन गरिन्छन्।
सो अवसरमा बोल्दै लिखु पिके गाउँपालिकाकी अध्यक्ष मीना कार्की बस्नेतले भारतको निरन्तर विकास सहयोगको सराहना गरिन । भारतीय दूतावासले यो परियोजनाले नेपाल र भारतबीचको घनिष्ठ विकास साझेदारीलाई झल्काउने बताएको छ।
विगत सात दशकमा भारत र नेपालबीचको विकास सहयोग विस्तार मात्र भएको छैन, बरु विभिन्न क्षेत्रमा यसको विविधीकरण पनि भएको छ। नेपालमा आधुनिक पूर्वाधार विकासका लागि सहयोगको सुरुवात सन् १९५१ मा काठमाडौंस्थित गौचर विमानस्थलको निर्माणसँगै भएको थियो, भारतको सहयोगमा यो परियोजना सन् १९५४ मा सम्पन्न भयो।
भारत सरकारका विभिन्न विकास परियोजनाहरूबीच समन्वय गर्न सन् १९५४ मा नेपालमा ‘इन्डियन एड मिसन’ स्थापना गरिएको थियो। त्यसयता, यो आपसी सहयोग दुई राष्ट्र बीचको साझेदारीको सबैभन्दा बलियो आधारस्तम्भ मध्ये एकका रूपमा स्थापित भएको छ।
