कपडाभित्र सिलिकनमा मिसाएर ल्याइएको ४.२५८ केजी कोकेन सहित दुई विदेशी महिला पक्राउ
काठमाडौं । नेपाल प्रहरीले सिलिकनमा मिसाएर कपडाको आकारमा तयार पारिएको ४ किलो २५८ ग्राम कोकेनसहित दुई विदेशी महिलालाई पक्राउ गरेको छ। यो नेपालमा कोकेन लुकाएर भित्र्याउने नयाँ शैली भएको प्रहरीको भनाइ छ।
लागुऔषध नियन्त्रण ब्यूरोका अनुसार त्रिभुवन अन्तर्राष्ट्रिय विमानस्थल हुँदै नेपाल आउने विदेशी नागरिकमाथि निगरानी गर्ने क्रममा साउन १ गते कतार एयरवेजको उडान नम्बर QR 646 मार्फत कोलम्बियाबाट दोहा हुँदै काठमाडौं आएकी ६२ वर्षीया कोलम्बियन नागरिक योनेथ गार्जोन काइसेडो (Yoneth Garzon Caicedo) लाई काठमाडौं महानगरपालिका–१६ ठमेलबाट पक्राउ गरिएको हो।
उनले साथमा ल्याएको सुटकेसभित्र फल्स बटम बनाई ब्ल्याङ्केट, म्याट, ज्याकेट, एप्रोन र नेक पिलोभित्र सिलिकनमा मिसाएर लुकाइएको अवस्थामा ४.२५८ केजी कोकेन बरामद भएको प्रहरीले जनाएको छ।
घटनाको थप अनुसन्धानका क्रममा उक्त कोकेन लिन भारतको मणिपुरबाट काठमाडौं आएकी ३७ वर्षीया भारतीय नागरिक रेबेका पुल्ले (Rebecca Pulle) लाई पनि साउन ४ गते पक्राउ गरिएको ब्यूरोले जनाएको छ।
प्रहरीले दुवै जनामाथि लागुऔषध सम्बन्धी कसुरमा अनुसन्धान अघि बढाएको छ। उनीहरूको साथबाट कोकेनसहित एक थान पासपोर्ट, चार थान मोबाइल, एक थान सुटकेस, भारतीय निर्वाचन आयोगको परिचयपत्र र २०० अमेरिकी डलर समेत बरामद गरिएको छ।
लागुऔषध नियन्त्रण ब्यूरोका अनुसार अन्य मुलुकबाट नेपालमा कोकेन तस्करी गर्ने क्रममा लिक्विड कोकेनलाई सिलिकनसँग मिसाएर कपडाको आकारमा तयार गरी लुकाउने यो विधि अहिलेसम्मकै नयाँ प्रवृत्ति (Trend) का रूपमा देखिएको छ।
