बाबुको चक्कु प्रहारबाट घाइते छोराको उपचारकै क्रममा मृत्यु
रुपन्देही । रुपन्देहीको तिलोत्तमा नगरपालिका–१० मैनिहवामा घरायसी विवादका क्रममा बाबुले चक्कु प्रहार गर्दा गम्भीर घाइते भएका एक युवकको उपचारकै क्रममा मृत्यु भएको छ।
मृत्यु हुनेमा सोही स्थानका २१ वर्षीय सरोज चौधरी रहेका छन्। चक्कु प्रहारबाट गम्भीर घाइते भएका उनलाई सुरुमा मणिग्रामस्थित क्रिमसन अस्पतालमा उपचार गरिएको थियो। थप उपचारका लागि मेडिकल कलेज भैरहवा रिफर गरिएकामा बिहीबार साँझ करिब ४:४० बजे उपचारकै क्रममा उनको मृत्यु भएको प्रहरीले जनाएको छ।
प्रहरीका अनुसार बिहीबार बिहान करिब ७ बजे सरोज आफ्नै घरको सिँढीबाट लड्दा जमिनमा रहेको चक्कुले ढाडमा काटेर घाइते भएको भन्ने सूचना क्रिमसन अस्पतालबाट प्राप्त भएको थियो।
तर घटनास्थलमा पुगेको प्रहरी टोलीले गरेको प्रारम्भिक अनुसन्धानमा भने वास्तविकता फरक रहेको खुलेको छ। अनुसन्धानका क्रममा घरायसी विवादका बेला सरोजका बाबु अन्दाजी ४५ वर्षीय सहसराम चौधरीले चक्कु प्रहार गरेको पुष्टि भएको प्रहरीले जनाएको छ।
घटनामा संलग्न सहसराम चौधरीलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।
