कोशी प्रदेश प्रहरी प्रमुखद्वारा कोशी प्रदेश प्रहरी गण विराटनगरको निरीक्षण
विराटनगर, साउन १८ गते । कोशी प्रदेश प्रहरी प्रमुख प्रहरी नायव महानिरीक्षक शेखर खनालले साउन १८ कोशी प्रदेश प्रहरी गण, विराटनगरको निरीक्षण गर्नु भएको छ ।
निरीक्षणका क्रममा उहाँले कार्यालय भवन, विभिन्न शाखा, मेस, चमेनागृह, पुस्तकालय तथा ब्यारेकको निरीक्षण अवलोकन गर्नुका साथै कार्यरत प्रहरी कर्मचारीहरुलाई आवश्यक निर्देशन दिनु भएको छ ।
निर्देशनको क्रममा उहाँले कोशी प्रदेश प्रहरी गणमा कार्यरत प्रहरी कर्मचारीहरु आगलागी, बाढी, पहिरो जस्ता विपद्को अवस्थामा र बन्द, हडताल लगायतका संवेदनशील अवस्थामा तत्काल परिचालन भई नागरिकको रक्षा तथा शान्ति सुरक्षा प्रदान गर्न शारीरिक तथा मानसिकरुपमा तन्दुरुस्त भई चौविसै घण्टा परिचालन हुन सक्ने गरी तयारी अवस्थामा रहन निर्देशन दिनु भएको छ ।
साथै उहाँले प्रहरी परिचालनको क्रममा आवश्यक स्रोत–साधन, हातहतियारको सुरक्षित प्रयोग गरी प्रहरी काम कार्वाहीलाई प्रभावकारी बनाउन प्रहरी परिचालन हुनु अगावै प्रहरी कर्मचारीहरुलाई आवश्यक व्रिफिङ तथा निर्देशन दिनु पर्ने बताउनु भएको छ ।
साथै उहाँले नागरिक सेवामा प्रहरीको भूमिका अत्यन्त महत्वपूर्ण रहेको उल्लेख गर्दै आपसी सहयोग, भाइचारा तथा सामूहिक भावनाका साथ जिम्मेवारी निर्वाह गर्न र प्रहरी संगठनको मर्यादा, अनुशासन, विश्वसनीयता कायम राख्दै उच्च मनोबलका साथ कार्य गर्न निर्देशन दिनु भएको छ ।
