इटहरीमा सिटी सफारीलाई जिपले ठक्कर दिँदा पाँच जना घाइते
सुनसरी । सुनसरीको इटहरी उपमहानगरपालिका–१७, पकलीस्थित सशस्त्र प्रहरी ब्यारेक नजिक पूर्व–पश्चिम राजमार्गमा जिपले सिटी सफारीलाई ठक्कर दिँदा चालकसहित पाँच जना घाइते भएका छन्।
मंगलबार इटहरीबाट झुम्कातर्फ जाँदै गरेको प्रदेश १–०२–००४ ह ४२४७ नम्बरको सिटी सफारीलाई सोही दिशाबाट आउँदै गरेको जिपले ठक्कर दिँदा दुर्घटना भएको हो।
दुर्घटनामा इटहरी उपमहानगरपालिका–४ निवासी ४८ वर्षीय सिटी सफारी चालक चन्द्रलाल चौधरीसहित पाँच जना घाइते भएका छन्। घाइते हुने अन्यमा मोरङको सुन्दरहरैँचा नगरपालिका–७ निवासी ७२ वर्षीय भीम परियार, सोही स्थानका ३० वर्षीय सबिन सुनारका ९ वर्षीय छोरा प्रनिस सुनार, ३० वर्षीया प्रिङका सोनाम र उनकी १४ वर्षीया छोरी प्रनिसा सोनाम रहेका छन्।
घाइते भीम परियार, प्रनिस सुनार, प्रिङका सोनाम र प्रनिसा सोनामको विराटनगरस्थित टिचिङ अस्पतालमा उपचार भइरहेको छ। सिटी सफारी चालक चन्द्रलाल चौधरीको भने स्थानीय सान्वी सिटी अस्पतालमा उपचार भइरहेको छ।
