सिमरावाट फेरि अर्की ११ बर्षिया बालिका हराईन, गरिमाको त्रास कायमै
बारा, ९ भदौ । बाराको जीतपुर सिमरा उपमहानगरपालिकामा तीन वर्षीया गरिमा चौधरीको बलात्कारपछि हत्या भएको घटना अझै सेलाउन नपाउँदै सोही क्षेत्रबाट अर्की बालिका बेपत्ता भएकी छन्।
जीतपुर सिमरा उपमहानगरपालिका–६ निवासी ११ वर्षीया सनाया खातुन मंगलबारदेखि सम्पर्कविहीन भएकी हुन्। बालिका बेपत्ता भएपछि परिवारले खोजीका लागि इलाका प्रहरी कार्यालय सिमरामा जानकारी गराएको छ।
सनाया बेपत्ता भएको जानकारी उनकी आमा गुलाप्सा खातुनले मंगलबार मध्यान्ह प्रहरीलाई गराएकी हुन्। सूचना प्राप्त हुनासाथ प्रहरीले बालिकाको खोजी सुरु गरेको जनाएको छ।
इलाका प्रहरी कार्यालय सिमराका प्रमुख डीएसपी दयाकृष्ण भट्टले बालिका बेपत्ता भएको निवेदन प्राप्त भएको पुष्टि गर्दै खोजी कार्य अघि बढाइएको जानकारी दिए।
केही समयअघि सिमरा क्षेत्रमै तीन वर्षीया गरिमा चौधरीको बलात्कारपछि हत्या भएको घटनाले स्थानीयवासीलाई त्रसित बनाएको थियो। उक्त घटनाको त्रास पूर्णरूपमा हट्न नपाउँदै फेरि ११ वर्षीया बालिका बेपत्ता भएपछि स्थानीयमा थप चिन्ता बढेको छ।
प्रहरीले बालिकाको खोजीका लागि सम्भावित स्थानमा निगरानी बढाउनुका साथै घटनाबारे थप अनुसन्धान गरिरहेको जनाएको छ।
