मोरङमा विभिन्न मुद्दाका १५ फरार प्रतिवादी एकै दिनमा पक्राउ
विराटनगर । मोरङ प्रहरीले विभिन्न मुद्दामा अदालतबाट दोषी ठहर भई फरार रहेका १५ जना प्रतिवादीलाई पक्राउ गरेको छ।
अदालतको फैसला कार्यान्वयनलाई प्रभावकारी बनाउँदै न्यायिक कारबाहीलाई पूर्णता दिने उद्देश्यले जिल्ला प्रहरी कार्यालय मोरङ तथा मातहतका प्रहरी कार्यालयबाट खटिएको टोलीले भदौ १५ गते उनीहरूलाई जिल्लाका विभिन्न स्थानबाट पक्राउ गरेको हो।
पक्राउ परेका सबैलाई आवश्यक कारबाही तथा जरिवाना असुलउपरका लागि मोरङ जिल्ला अदालत, विराटनगरमा बुझाइएको जिल्ला प्रहरी कार्यालय मोरङका सूचना अधिकारी डीएसपी मकेन्द्रकुमार मिश्रले जानकारी दिए।
प्रहरीका अनुसार पक्राउ पर्नेमा जबरजस्ती करणी मुद्दाका ४ जना, अभद्र व्यवहारका ५ जना, चेक अनादरका १ जना, चोरीका १ जना, सवारी ज्यानका १ जना, बैंकिङ कसूरका १ जना, बैंकिङ तथा वित्तीय कारोबारका १ जना र अंगभंग मुद्दाका १ जना छन्।
यससँगै विभिन्न मुद्दामा अदालतबाट दोषी ठहर भई लामो समयदेखि फरार रहेका १५ जना प्रतिवादी पक्राउ परेका हुन्।
प्रहरीले अदालतबाट फैसला भई फरार रहेका अन्य प्रतिवादीको खोजी तथा पक्राउ अभियानलाई पनि निरन्तरता दिने जनाएको छ।
