धनकुटा र झापाबाट लागूऔषध सहित ४ जना पक्राउ
विराटनगर, असोज ३ गते । झापा र धनकुटाबाट प्रहरीले लागूऔषधसहित चार जनालाई पक्राउ गरेको छ।
असोज २ गते झापाको दमक नगरपालिका–५ मा इलाका प्रहरी कार्यालय दमकबाट खटिएको प्रहरी टोलीले चेकजाँच गर्ने क्रममा दमक–५ का सुजन माझी, सुविन कुमाल र कुलप्रसाद सिवाकोटीलाई पक्राउ गरेको हो।
चेकजाँचका क्रममा सुजन माझीको साथबाट लुकाइछिपाई राखेको अवस्थामा ३ ग्राम ९१० मिलिग्राम ब्राउन सुगर बरामद भएको प्रहरीले जनाएको छ।
त्यस्तै, जिल्ला प्रहरी कार्यालय धनकुटाले महालक्ष्मी नगरपालिका–८ घर भई हाल धनकुटा नगरपालिका–६ मा बस्दै आएका उज्वल थापालाई प्रतिबन्धित लागूऔषध ट्रामाडोल र स्पास्पेन गरी जम्मा ४०८ क्याप्सुलसहित उनकै घरबाट पक्राउ गरेको छ।
पक्राउ परेका चारै जनामाथि थप अनुसन्धान भइरहेको प्रहरीले जनाएको छ।
