सरकारी कामकाजको भाषामा किरातलाई समेट्न माग गर्दै कोशी प्रदेशसभा अगाडि प्रदर्शन
विराटनगर । कोशी प्रदेशको सरकारी कामकाजको भाषा सम्बन्धी विधेयकमा किरात भाषालाई समेट्नुपर्ने माग गर्दै किरात राई यायोक्खाले प्रदेशसभा भवनअगाडि विरोध प्रदर्शन गरेको छ।
शनिबार मोरङको कटहरी गाउँपालिका–१ स्थित कोशी प्रदेशसभा भवनअगाडि यायोक्खाका केन्द्रीय अध्यक्ष जीवन हाचो राईको नेतृत्वमा प्रदर्शन गरिएको हो। प्रदर्शन भइरहँदा प्रदेशसभाभित्र भने बैठक जारी थियो।
प्रदेशसभामा सरकारी कामकाजको भाषा सम्बन्धी विधेयकमाथि छलफल तथा निर्णयको प्रक्रिया अघि बढाउने कार्यसूची रहेकै दिन यायोक्खाले प्रदर्शन गरेको हो।
नेपाली भाषाबाहेक लिम्बू र मैथिली भाषालाई कोशी प्रदेशको सरकारी कामकाजको भाषाका रूपमा मान्यता दिने प्रस्ताव गरिए पनि किरात भाषालाई समेट्ने व्यवस्था नगरिएको भन्दै यायोक्खाले विरोध जनाएको छ।
प्रदर्शनकारीहरूले प्रदेशको भाषासम्बन्धी नीतिमा किरात भाषालाई पनि समेट्नुपर्ने माग गर्दै सरकारले किरात भाषालाई उपेक्षा गरेको आरोप लगाएका छन्।
