मोरङ र सुनसरीबाट लागूऔषध तथा प्रतिबन्धित औषधि सहित तीन जना पक्राउ
विराटनगर, असोज २५ । मोरङ र सुनसरीका विभिन्न स्थानबाट लागूऔषध तथा प्रतिबन्धित औषधिसहित तीन जना पक्राउ परेका छन्।
प्रहरीका अनुसार असोज २४ गते मोरङको कानेपोखरीमा खटिएको प्रहरी टोलीले धनकुटाको सहिदभूमि गाउँपालिका–२ की २२ वर्षीया मुस्कान राईलाई एक किलो १८ ग्राम गाँजासहित पक्राउ गरेको हो।
त्यस्तै, सुनसरीको इटहरी उपमहानगरपालिका–९ का १९ वर्षीय रिकेश चौधरीलाई ५१० मिलिग्राम ब्राउन सुगरजस्तो पदार्थसहित पक्राउ गरिएको छ। उनलाई वडा प्रहरी कार्यालय इटहरीबाट खटिएको प्रहरी टोलीले पक्राउ गरेको हो।
यसैगरी, इटहरी उपमहानगरपालिका–१३ का २७ वर्षीय सुनिल सरदारलाई नाइट्राजेपामका १२६ ट्याब्लेटसहित प्रहरी चौकी खनारले पक्राउ गरेको प्रहरीले जनाएको छ।
पक्राउ परेका तीनै जनामाथि थप अनुसन्धान भइरहेको प्रहरीले जनाएको छ।
