टिकटकमा आपत्तिजनक भिडियो पोस्ट गर्ने एक जना पक्राउ
धनुषा । सामाजिक सञ्जाल टिकटकमा हिंसा फैलाउन उत्प्रेरित गर्ने, गालीगलौज तथा धम्कीपूर्ण अभिव्यक्ति समेटिएका भिडियो पोस्ट गरेको आरोपमा धनुषामा एक जना पक्राउ परेका छन्।
जिल्ला प्रहरी कार्यालय धनुषाका अनुसार लक्ष्मीनिया गाउँपालिका–१ निवासी अन्दाजी २० वर्षीय राजु यादवलाई प्रहरीले नियन्त्रणमा लिएको हो। उनलाई असोज २७ गते राति करिब ११ बजे जनकपुर उपमहानगरपालिका–९ बाट नियन्त्रणमा लिइएको प्रहरीले जनाएको छ।
प्रहरीका अनुसार यादवले विभिन्न व्यक्ति, समुदाय तथा संगठनको मर्यादामा आँच पुग्ने गरी गालीगलौज गर्ने, आपत्तिजनक शब्द प्रयोग गर्ने र धाकधम्की दिने किसिमका भिडियो टिकटकमा अपलोड गरेको पाइएको छ। उनीमाथि प्रचलित कानुनबमोजिम कारबाही प्रक्रिया अघि बढाइएको प्रहरीले जनाएको छ।
यसैगरी, सामाजिक सञ्जालको दुरुपयोग गरी हिंसा फैलाउन उत्प्रेरित गर्ने, गालीगलौज तथा धम्कीपूर्ण सामग्री पोस्ट गरेको आरोपमा अन्य चार जनामाथि समेत अनुसन्धान तथा कानुनी कारबाही भइरहेको जिल्ला प्रहरी कार्यालय धनुषाले जनाएको छ।
जिल्ला प्रहरी कार्यालय धनुषाका प्रवक्ता तथा सूचना अधिकारी प्रहरी नायब उपरीक्षक ओमप्रकाश खनालले सामाजिक सञ्जालको दुरुपयोगसम्बन्धी घटनामा अनुसन्धान भइरहेको जानकारी दिएका छन्।
