सुनसरीमा ९१५ किलो गाँजा सहित चार जना पक्राउ
सुनसरी — सुनसरीको इनरुवा नगरपालिका–४ स्थित ज्ञानोदय टोलबाट प्रहरीले ९१५ किलोभन्दा बढी गाँजाजस्तो देखिने पदार्थ र मोटरसाइकलसहित चार जनालाई नियन्त्रणमा लिएको छ।
जिल्ला प्रहरी कार्यालय सुनसरीका अनुसार गए राति करिब १:३० बजे इनरुवा नगरपालिका–४ स्थित हनुमान मन्दिर नजिक बुलबुल यादवको घरमा गाँजा बिक्री–वितरण भइरहेको विशेष सूचना प्राप्त भएको थियो।
सोही सूचनाका आधारमा जिल्ला प्रहरी कार्यालय सुनसरीबाट खटिएको प्रहरी टोलीले बुलबुल यादवको घरकोठामा कानुनी प्रक्रियाअनुसार खानतलासी गरेको थियो। खानतलासीका क्रममा घरमा लुकाइछिपाइ राखिएको गाँजाजस्तो देखिने पदार्थ ९१५ किलो ६८० ग्राम र को १–०२–००१ प ९९९९ नम्बरको मोटरसाइकल फेला परेको प्रहरीले जनाएको छ।
प्रहरीले घटनामा संलग्न रहेको आशंकामा चार जनालाई नियन्त्रणमा लिएको छ। पक्राउ पर्नेमा इनरुवा नगरपालिका–४ का ३६ वर्षीय बुलबुल यादव, २३ वर्षीय सन्तोष यादव, ३० वर्षीय आशिष यादव र दुहबी नगरपालिका–१० का २२ वर्षीय कुन्दन यादव रहेका छन्।
उनीहरूलाई बरामद पदार्थ र मोटरसाइकलसहित जिल्ला प्रहरी कार्यालय सुनसरीमा ल्याई थप अनुसन्धान भइरहेको प्रहरीले जनाएको छ।
