इलाममा बन्यो सिटीमार्ट
इलाम, २१ असोज ।इलाम नगरपालिकाले सार्वजानिक निजी साझेदारीको ऐन बनाएपछि नगरपालिका र निजी क्षेत्रको लगानीमा इलाममा व्यावसायिक भवन इलाम सिटीमार्ट निर्माण भएको छ । सिटीमार्टको इलाम नगरपालिकाका प्रमुख महेश बस्नेत र उपप्रमुख सुशीला नेम्वाङले बिहीबार संयुक्त रूपमा उद्घाटना गरेका छन् ।
निजी क्षेत्रको तीन करोड आठ लाख ९१ हजार चार सय ४० रुपैयाँ, इलाम नगरपालिकाको आठ करोड ३५ लाख ९२ हजार छ सय ५० रुपैयाँ र प्रदेश सरकारको सशर्त अनुदानको ४० लाख रुपैयाँ गरी १२ करोड १९ लाख ५४ हजार दुई सय ३७ रुपैयाँको लागतमा सिटीमार्ट निर्माण भएको हो ।
सात सय ७१ दशमलव २७ वर्गमिटर क्षेत्रफलमा चारतले व्यावसायिक भवन निर्माण भएको छ । भवनमा पसल सञ्चालनको लागि ९६ वटा सटर बनाइएको छ । भवनमा तीन सय ३० जना क्षमताको एउटा पार्टी प्यालेस र एक सय २० क्षमताको एउटा रेस्टुरेन्टसमेत बनाइएको छ । मुख्य भवनअघि दुईवटा ब्लकमा पाँचवटा सटरसमेत निर्माण गरिएको छ ।
त्यस्तै, छुट्टै मासु पसलसमेत बनाइएको छ । आयोजना अन्तर्गत नै मोटरसाइकल पार्किङ भवनमाथि एउटा रेस्टुुरेन्टसमेत निर्माण गरिएको इलाम नगरपालिकाका इञ्जिनियर दीपक गुरागाईंले जानकारी दिए । सिटीमार्टमा दुईवटा लिफ्टसमेत जडान गरिएको छ ।
भवनको माथिल्लो तलामा बनाइएको रेस्टुरेन्ट, पार्टी प्यालेस ७६ वटा पसल भाडामा लागिसकेको छ । त्यसबाट मासिक ६ लाख ७४ हजार तीन सय २९ रुपैयाँ मासिक भाडा संकलन हुन थालेको छ ।
दोस्रो तलामा रहेका २० वटा सटर भाडा लाग्न बाँकी रहेको नगरपालिकाले जनाएको छ । अहिले भइरहेको आम्दानीले सिटीमार्ट र अन्य सटरहरूमा गरिएको लगानी बराबरको रकम फिर्ता हुन २० वर्ष लाग्छ । नगरपालिकाले मात्रै गरेको लगानी भने दश वर्षभित्रमा फिर्ता हुन्छ । तर, २० वटा सटर भाडामा लाग्दा त्योभन्दा पहिले नै लगानी फिर्ता भइसक्ने इञ्जिनियर गुुरागाईंले बताए ।
इलाम नगरपालिकाको आह्वान बमोजिम व्यवसायीहरूले एक लाख ५० हजार रुपैयाँदेखि १० लाख रुपैयाँसम्म लगानी साझेदारी गरेका छन् । लगानी साझेदारी गरेका व्यवसायीहरूले चार हजार पाँच सय रुपैयाँदेखि १५ हजार रुपैयाँसम्म मासिक भाडा तिर्ने कबुल गरेका छन् ।
सिटीमार्टमा लगानी गरेका कतिपयले लगानी फिर्तासमेत माग गरेका छन् । लगानी फिर्ता गर्न चाहेका व्यवसायीले गरेको कोठा भाडा मागिसकेको छैन । भाडा नलागेका सटरहरूलाई भाडामा लगाउन नगरपालिकाले प्रक्रिया सुुरु गरिसकेको छ । नगरपालिकाको सटरमा व्यवसाय गर्नेलाई निषेधाज्ञा र लकडाउनको अवधिको भाडामा ४० प्रतिशत मिनाह गर्ने भएको छ ।
इलाम नगरपालिका प्रमुख महेश बस्नेतले इलाममा लगानी प्रवद्र्धन गर्ने नीतिअनुसार सार्वजानिक निजी साझेदारीमा सिटीमार्ट निर्माण भएको बताए । ‘हामीले सार्वजनिक निजी साझेदारीको ऐन नै बनाएर काम थालेका हौ’, उनले भने, ‘संघमा पनि सार्वजनिक निजी साझेदारीको नीति मात्र छ, कानुन बनेको छैन । हामीले लगानीलाई कानुनी रूपमा संरक्षित गर्नुपर्छ भनेर ऐन बनाएका हौँ ।’ प्रमुख बस्नेतले सार्वजनिक निजी साझेदारी कानुन बनाउने इलाम पहिलो नगरपालिका भएको दावी गरेका छन् ।
