स्वास्थ्य सेवाको प्रदेश स्तरिय बार्षिक समीक्षा गोष्ठि शुरु
विराटनगर, १४ कात्तिक । प्रदेश १ को स्वास्थ्य सेवा तथा कार्यक्रमहरुको प्रदेश १ स्तरिय बार्षिक समीक्षा गोष्ठि आजदेखि विराटनगरमा शुरु भएको छ ।
तीन दिन चल्ने समीक्षा कार्यक्रममा प्रदेश जनस्वास्थ्यको सेवा प्रवाह, प्रदेश स्वास्थ्य उपचारात्मक सेवा प्रवाह र प्रदेश आयुर्वेद सेवा प्रवाहका विषयमा प्रस्तुतीकरण र छलफल हुने प्रदेश स्वास्थ्य निर्देशनालयका निर्देशक ज्ञाबहादुर वस्नेतले जानकारी दिनुभयो ।
आजको कार्यक्रममा स्वास्थ्य कार्यालयहरुको जिल्लागत प्रस्तुतीकरण र छलफल कार्यक्रम गरिएको निर्देशक वस्नेतले बताउनुभयो । उहाँका अनुसार सोमबार जिल्ला अस्पतालहरुको प्रस्तुतीकरण, प्रदेश स्वास्थ्य तालिम केन्द्र, प्रदेश स्वास्थ्य आपुर्ती व्यवस्थापन केन्द्र र प्रदेश जनस्वास्थ्य प्रयोगशाला, विराटनगर महानगरपालिका लगायत विभिन्न निकायको प्रस्तुती करण हुनेछ ।
मंगलबार १४ जिल्लाका आयुर्वेद कार्यालय र आयुर्वेद तथा वैकल्पिक चिकित्सा सेवा विभागको प्रस्तुती रहने निर्देशक बस्नेतले बताउनुभयो । समीक्षा कार्यक्रमको अन्तिम दिन गुणस्तरिय आयुर्वेद सेवा प्रदान गर्न प्रदेश र स्थानीय तहवीच समन्वय र सहकार्य संवन्धि अन्र्तक्रिया कार्यक्रम पनि हुने बताईएको छ ।
जुमानु प्रेरित खुमलटार फाइनलमा, उपाधिका लागि झापासँग खेल्ने
काठमाडौं, १४ कात्तिक/राष्ट्रिय फुटबल टोलीका सदस्य जुमानु राई प्रेरित एफ डी खुमलटार भेट्रान्स क्लब ‘मेयर कप भेट्रान्स फुटबल प्रतियोगिता’को फाइनल प्रवेश गरेको छ । आइतबार त्रिपुरेश्वरस्थित दशरथ रंगशालामा भएको दोस्रो सेमिफाइनलमा सानो गौचरण नाइट किङ क्लब (एसएनकेसी) लाई २-० गोल अन्तरले पराजित गर्दै खुमलटारले उपाधिका लागि झापा भेट्रान्स एफसीसँगको भेट पक्का गरेको हो ।
खुमलटारको जितमा रितेश खड्का र जुमानु राईले समान एकएक गोेल गरे । खुमलटारले पहिलो हाफमा गरेको दुई गोललाई जोगाउँदै अपराजित रहँदै फाइनल पुगेको हो । खेलको पाँच मिनेटमा सानो गौचरणका दिनेश ब्यञ्जनकारले गरेको गल्तीको फाइदा उठाउँदै १८ यार्ड बक्सबाट रितेशले उत्कृष्ट गोल गरे । त्यसको दुई मिनेटमै जुमानुले खुमलटारको अग्रता दोब्बर बनाए । बक्सभित्र सानो गौचरणका तीन डिफेण्डरलाई बिट गर्दै जुमानुले आकर्षक गोल गरे ।
दोस्रो हाफमा थप गोल नहुँदा खुमलटार पहिलो संस्करणको भेट्रान्स कपको फाइनलमा पुग्न सफल भयो । खेलको म्यान अफ दि म्याच खुमलटारका राजकुमार केसी भए । यसअघि आइतबारै भएको पहिलो सेमिफाइनलमा झापाले बलियो आर्मी भेट्रान्स टोलीलाई २-० गोल अन्तरले पराजित गर्दै फाइनल प्रवेश गर्याे ।
झापाको जितमा कप्तान भेषराज लिम्बू र श्यामकुमार गोलेले एकएक गोल गरे । खेलको पहिलो हाफ बराबरी सकिँदा दोस्रो हाफमा झापाले दुई गोल गरेको थियो । भेषले खेलको ४७ र श्यामले ६० मिनेटमा गोल गरे । झापाका कप्तान भेष म्यान अफ द म्याच घोषित भए । प्रतियोगितामा आर्मीको पहिलो हार हो भने झापा अपराजित छ ।
लिगकप नकआउट प्रणालीमा खेलाइएको प्रतियोगितामा २१ टिमले प्रतिस्पर्धा गरेका थिए । २१ टिमलाई सात समूहमा विभाजन गरिएको थियो । प्रत्येक समूहका विजेता र एक उत्कृष्ट उपविजेता टिमले दोस्रो चरणमा स्थान बनाएका थिए । प्रतियोगिताको विजेता टोलीले पाँच लाख र उपविजेताले दुई लाख ५० हजार रुपैयाँ नगद पुरस्कार जित्नेछन् । फाइनल खेल मंगलबार हुनेछ ।
