क्रिस गेलको टोलीविरुद्ध खेल्दै सन्दीप
एजेन्सी – नेपाली क्रिकेट टोलीका स्पिनर सन्दीप लामिछानेले ग्लोबल टि२० क्यानडामा आज राती सर्रे जागुअर्सबाट मिसिसौगा प्यान्थर्ससँग खेल्दैछ । खेल आज मध्य राती १ : १५ मा मा सुरु हुनेछ ।
प्यान्थर्सको कप्तानी शोएब मलिक र जागुअर्सको इफ्तिखर अहमदले गर्नेछन् । नेपाली स्पिनर सन्दीप राम्रो लयमा छन् । सन्दीपले ३ खेलमा ४ विकेट लिएका छन् । सर्रे ३ खेलमा १ मा जित र १ मा हारसहित ३ अंकका साथ चौथो स्थानमा छ । प्यान्थर्स सुरुवाती चारै खेलमा पराजित भएको छ ।
मिसिसौगा प्यान्थर्समा शोएब मलिब, आजम खान, क्रिस गेल र जेम्श निसम जस्ता खेलाडी छन् । गेलले यस सिजनमा १०, ६१, १ र ४ रन बनाएका छन् । उनीबाट टोली उत्कृष्ट प्रदर्शन चाहन्छ । उता सन्दीपको टोलीमा इफ्तिखर अहमद, बेन कटिङ, एलेक्स हेल्स, लिटन दास र मोहम्मद हरिस जस्ता ब्याटर छन् ।
उता दीपेन्द्रसिंह ऐरी सम्मिलित मोन्टरिएल टाइगर्सले टोरान्टो नेशनलसँग शनिबार साँझ प्रतिस्पर्धा गर्नेछ । टाइगर्स ४ खेलमा ३ मा जित र १ मा हारसहित दोस्रो स्थानमा छ । दीपेन्द्रले तीन खेलमा २८, २२ र २८ रन बनाउनुको साथै एक विकेट लिएका छन् ।
दीपेन्द्रले सर्रे र ब्राम्पटन वल्भसविरुद्ध टोलीकै सर्वाधिक समान २८ रन बनाएका थिए । ब्राम्पटन ४ खेलमा ७ अंकका साथ शीर्षस्थानमा छ ।
