माओवादी जनतासँगको सम्बन्ध पानी र माछा…अभिभावक र छोराछोरीको जस्तो बनाउने अभियानमा छः प्रचण्ड
काठमाडौं, ३२ साउन । प्रधानमन्त्री पुष्पकमल दाहाल ‘प्रचण्ड’ ले आफूहरु समाजवादका लागि शान्तिपूर्ण लडाईँमा रहेको बताएका छन् । २०औं दोरम्बा हत्याकाण्ड दिवसको अवसरमा आयोजित कार्यक्रमलाई सम्बोधन गर्दै उनले. माओवादी फेरि एक पटक जनताको घरघरमा गएर जनतासँग जोडिने, संगठनलाई सुदृढ गर्ने संकल्पका साथ अगाडि बढिरहेको उनले बताए ।
‘हिजो हामी रत्तपातपूर्ण क्रान्तिमा थियौं । हातमा बन्दुक थियो । हामी लडाईँमा थियौं । तर, अहिले समाजवादका लागि हामी अर्को लडाईँमा जाँदैछौं । एकातिर सरकारले सुरुवात गरेको सामाजिक न्याय, सुशासन र समृद्धिको लडाईँ अर्कोतिर हाम्रो पार्टीले सुरुवात गरेको समाजवादको निम्ति रुपान्तरणको अभियान जनताको घरघर र जनजनमा पुगेर फेरि एकचोटी जनतासँग जोडिने, संगठनलाई सुदृढ गर्ने र समाजवादी क्रान्तिको नयाँ यात्रा सुरु गर्ने संकल्पमा हामी छौं,’– उनले भने ।
माओवादी शान्तिपूर्ण राजनीतिमा आएपछि बीचमा केही कमी कमजोरी गरेको उनको स्वीकारोक्ति थियो । उनले आफूहरु सुध्रिएर आत्मसमीक्षाको साथ अगाडि बढ्ने संकल्प गरिसकेको बताए ।
‘बीचमा केही कमीहरु भए । हामी अहिले आत्मसमीक्षा गरिराखेका छौं । तपाईँहरुका अगाडि, जनताको अगाडि, हाम्रा महान सहिदहरुका परिवारको अगाडि, बेपत्ता योद्धाहरुको परिवारको अगाडि, घाईते, अपाङ्ग र हिजो जनयुद्धमा हामीलाई साथ दिने जनताको अगाडि आत्मालोचना गर्दै हामी फेरिन चाहन्छौं । हामी तपाईँहरुसँग जोडिन चाहन्छौं । हामी फेरि एक भएर समाजवादको यात्रा अगाडि बढाउन चाहन्छौं भन्ने संकल्प गरेका छौं,’– उनले भने ।
तीन महिने अभियान लिएर नेता तथा कार्यकर्ताहरु जनताको घरघरमा जाने उनले बताए । माओवादी समर्थक र शुभचिन्तकको घरमा मात्रै नभएर यो अभियानमा माओवादी सपोर्ट, विरोधी र सबै राजनीतिक दलका नेता तथा कार्यकर्ताको घरमा पनि गएर अहिले देशको स्थिति, माओवादीको चाहना, अहिले सरकारले लिएका नीति, कार्यक्रम र योजनका बारेमा बताईने उनको दाबी छ ।
तत्कालीन समयमा शान्तिपूर्ण वार्ता चलिरहेको अवस्थामा शान्तिविरोधी शक्तिहरुले दोरम्बा हत्याकाण्ड घटाएको उनको आरोप छ । उनले दोरम्बा घटना माओवादी जनआन्दोलनको इतिहासमा पृथक पृष्ठभूमिमा घटेको बताउँदै यसलाई संसारले नियाँलेको बताए ।
‘वीरता र बलिदानको प्रतीक दोरम्बा देशभरमात्रै चिनिएको छैन । संसारभर चिनिएको छ । शान्ति वार्ता चलिराखेको बेलामा शान्ति भंग गर्ने मनशायले केही प्रतिगामी तत्वहरुले गरेको षड्यन्त्रको प्रतीकका रुपमा र क्रान्तिकारीहरुबाट प्रदर्शन गरिएको वीरता र बलिदानीको रुपमा दोरम्बा संसारभर स्थपित छ,’– उनले भने ।
हिजोको जस्तै पानी र माछा, नङ र मासु, अभिभावक र छोराछोरीको सम्बन्ध बनाउने उद्देश्यका साथ शान्तिपूर्ण क्रान्तिको अभियानमा माओवादी रहेको उनको भनाई छ । भ्रष्टाचार, विभेद र अपमानका विरुद्ध आफूहरुले शान्तिपूर्ण रुपमा क्रान्ति गरिरहेको उनले बताए । सबै गठबन्धन दल र सबै शुभ चिन्तकलाई सामाजिक न्याय र भ्रष्टाचारविरुद्धको अभियानमा साथ दिन उनले अपील गरे ।
