उच्चपदस्थहरूको फुर्सद : प्रधानमन्त्री, सभामुख र दुई मन्त्रीले रियालिटी शोमा बिताए पाँच घण्टा
काठमाडौं । देशको कार्यकारी प्रमुख प्रधानमन्त्री पुष्पकमल दाहाल प्रचण्ड र व्यवस्थापिका प्रमुख सभामुख देवराज घिमिरे हिजो एउटा कार्यक्रममा एकसाथ देखा परे । एउटा टिभी रियालिटी शोमा प्रधानमन्त्री प्रमुख अतिथि र सभामुख विशेष अतिथि बनेर पुगेका थिए ।
प्रधानमन्त्री र सभामुख एउटै कार्यक्रममा उपस्थित हुनु अनौठो होइन । अनौठो त यो भयो कि उनीहरूले ढुक्कसँग पाँच घण्टा रियालिटी शो हेरेर बिताए । फेरि यो कुनै देशका बारेमा गम्भीर चिन्तन–बहस गर्ने कार्यक्रम नभएर नितान्त मनोरञ्जनात्मक कार्यक्रम थियो । इन्ट्रा फाउन्डेसन अमेरिका नाम संस्थाले आयोजना गरेको मेरो भ्वाइस युनिभर्स र मेरो डान्स युनिभर्सको संयुक्त फाइनलमा यति उनीहरूले समय दिएका हुन् ।
कार्यक्रममा प्रधानमन्त्री र सभामुख मात्र होइन, संघीय सरकारका दुई मन्त्री पनि सहभागी थिए । परराष्ट्र मन्त्री एनपी साउद र ऊर्जामन्त्री शक्ति बस्नेत पनि रमाइलो हेर्न गोदावरीको सनराइज सम्मेलन केन्द्र पुगेका हुन् । तर, उनीहरू त्यहाँ भूमिकाविहीन थिए । प्रधानमन्त्रीले विजेतालाई ट्रफी र सभामुखले चेक वितरण गर्दा मन्त्रीद्वय पछाडि उभिएर ताली बजाउनमै सीमित भए ।
उच्चपदस्थहरू बेलुकी ५ बजे कार्यक्रम स्थलमा पुगेर राति १० बजेसम्म बसेका थिए । देश हाँक्ने जिम्मेवारीमा रहेका उच्च ओहदाका दुई पात्रले यसरी एउटा पाँच घण्टासम्म एउटा रमाइलो कार्यक्रममा बिताउँदा दर्शकले भने पक्कै रमाइलो मानेनन् ।
यी दुई रियालिटी शोको आयोजना इन्ट्रा फाउन्डेसन अमेरिकाले गरेको हो । यो संस्था भुटानबाट लखेटिएर नेपाल हुँदै अमेरिका पुगेका भुटानीहरूले खोलेका हुन् ।
मेरो भ्वाइस युनिभर्सको विजेता सिक्किमका प्रितम राई भएका छन् भने थाइल्यान्डकी खुशी कार्कीले मेरो डान्स युनिभर्सको उपाधि जितेकी छन् । यो रियालिटी शोमा अहिलेसम्मकै ठूलो धनराशी पुरस्कार राखिएको छ । दुवै विजेताले एक-एक करोड हात पारेका छन् ।
