बिर्तामोडमा मोटरसाइकल र अटो ठोक्किँदा एक जनाको मृत्यु, एक घाइते
झापा । झापाको बिर्तामोड नगरपालिका वडा नं. ५ स्थित अदुवाखोला पुल नजिक पूर्व–पश्चिम राजमार्गमा भएको सवारी दुर्घटनामा एक जनाको मृत्यु भएको छ भने एक जना घाइते भएका छन्।
गत माघ ३ गते राति करिब १०:५० बजे लक्ष्मीपुरबाट मुक्तिचोकतर्फ आउँदै गरेको प्र.१–०२–०४२ प १९०४ नम्बरको मोटरसाइकलले वनस्टप मलबाट अदुवाखोलातर्फ जाँदै गरेको मे.१ ह ३७२१ नम्बरको अटोलाई ठक्कर दिएको जिल्ला प्रहरी कार्यालय झापाले जनाएको छ।
दुर्घटनामा मोटरसाइकल चालक गौरादह नगरपालिका वडा नं. ३ निवासी अन्दाजी २४ वर्षका निरज कार्की र पछाडि सवार दमक निवासी अन्दाजी २२ वर्षीया सुजाता बुढाथोकी गम्भीर घाइते भएका थिए। दुवैको टाउकोमा चोट लागेको र तत्काल उपचारका लागि बिर्तामोडस्थित बीएनसी अस्पतालमा भर्ना गरिएको थियो।
उपचारकै क्रममा मिति २०८२ साल माघ ५ गते बिहान करिब ४:०० बजे सुजाता बुढाथोकीको मृत्यु भएको प्रहरीले जानकारी दिएको छ। मृतकको शव सोही अस्पतालमा राखिएको छ।
दुर्घटनामा संलग्न दुवै सवारी साधन नियन्त्रणमा लिइएको छ। अटो चालक अर्जुनधारा नगरपालिका वडा नं. ६ निवासी अन्दाजी ३४ वर्षका खेमराज खड्का र मोटरसाइकल चालक निरज कार्कीलाई सामान्य उपचारपछि नियन्त्रणमा लिई इलाका प्रहरी कार्यालय अनारमनीमा राखिएको छ।
घटनाबारे थप अनुसन्धान तथा कानुनी प्रक्रिया अघि बढाइएको जिल्ला प्रहरीले जनाएको छ।
