पथरीको सुन्दर सामुदायिक वनमा एक पुरुष मृत अवस्थामा फेला
मोरंग । मोरङको पथरीशनिश्चरे नगरपालिका–२ स्थित सुन्दर सामुदायिक वनभित्र एक अन्दाजी ५५/६० वर्षीय पुरुष मृत अवस्थामा फेला परेका छन् ।
माघ ११ गते दिउँसो करिब २ बजे पंचायत माध्यमिक विद्यालयबाट करिब ६ सय मिटर सिधा पूर्व तथा बुद्ध चोक–सेल्फी रोड पक्की सडक खण्डबाट करिब ३ सय मिटर उत्तरतर्फ पर्ने सुन्दर सामुदायिक वनको पोखरीबाट करिब २० मिटर उत्तर–पश्चिम कुनामा ती पुरुष मृत अवस्थामा फेला परेका हुन् ।
हाल मृतकको शव मदन भण्डारी अस्पताल तथा ट्रमा सेन्टर, मंगलबारेमा राखिएको छ । मृतकको हुलिया अनुसार उनले कालो ज्याकेट, कलेजी रंगको टाउजर, सेतो–हरियो स्विटर र कालो जुत्ता लगाएका थिए । उनको उचाइ करिब ४ फिट १० इन्च रहेको जनाइएको छ ।
मृतकको साथबाट भारत निर्वाचन आयोग (Election Commission of India) को परिचय पत्र फेला परेको छ, जसमा नाम Shiam Lal र पिता Jeet Ram उल्लेख रहेको छ । साथै भारत सरकारको आयकर विभागको परिचय पत्रमा पनि सोही नाम उल्लेख भएको र जन्म मिति सन् १९५१ जनवरी १ देखिएको प्रहरीले जनाएको छ ।
मृत्युको कारण खुल्न बाँकी रहेको र घटनाबारे थप अनुसन्धान भइरहेको सम्बन्धित निकायले जनाएको छ । मृतकको पहिचान वा आफन्तजनको बारेमा जानकारी हुने व्यक्तिले नजिकको प्रहरी कार्यालय वा सम्बन्धित निकायमा सम्पर्क गर्न अनुरोध गरिएको छ ।
