सुधन गुरुङ पुनः गृहमन्त्री बन्ने तयारी
काठमाडौ । बालेन्द्र शाह नेतृत्वको सरकारमा सुधन गुरुङ पुनः गृहमन्त्री नियुक्त हुने भएका छन्। सम्पत्ति विवादका कारण पदबाट राजीनामा दिएका गुरुङलाई छानबिन समितिले सफाइ दिएपछि पुनः गृह मन्त्रालयको जिम्मेवारी दिने तयारी गरिएको हो।
प्रधानमन्त्री कार्यालय स्रोतका अनुसार गुरुङको शपथग्रहणका लागि आज दिउँसो ३ बजे राष्ट्रपति कार्यालयमा पत्राचार गरिएको छ। आवश्यक प्रक्रिया पूरा भइसकेको र आजै शपथ हुने सम्भावना रहेको जनाइएको छ।
यसअघि सम्पत्ति विवरणलगायतका विषयमा विवाद चुलिएपछि गुरुङले गृहमन्त्री पदबाट राजीनामा दिएका थिए। त्यसपछि सरकारले उनीमाथि लागेका आरोपहरूको सत्यतथ्य छानबिन गर्न समिति गठन गरेको थियो।
समितिले गुरुङविरुद्ध उठाइएका आरोप पुष्टि हुने पर्याप्त आधार नभेटिएको निष्कर्ष निकाल्दै उनलाई क्लिन चिट दिएको थियो। सोही प्रतिवेदनका आधारमा उनको पुनर्नियुक्तिको बाटो खुलेको हो।
