भारतीय नम्बर प्लेटको कारबाट १८ सय एम्पुल र ५१० ट्रामाडोल क्याप्सुल बरामद, पाँच भारतीय पक्राउ
काठमाडौं, असार २९ — भारतीय नम्बर प्लेटको कारभित्र लुकाएर पोखरासम्म ल्याइएको ठूलो परिमाणको लागूऔषधसहित पाँच जना भारतीय नागरिक पक्राउ परेका छन्।
लागूऔषध नियन्त्रण ब्यूरोको शाखा कार्यालय पोखराबाट खटिएको प्रहरी टोलीले इलाका प्रहरी कार्यालय डाँडाको सहयोगमा असार २८ गते कास्कीको पोखरा महानगरपालिका–३२, मजुवाबाट कारबाही गर्दै भारतीय नम्बर प्लेट UP53Y7704 भएको कारबाट नियन्त्रित लागूऔषध बरामद गरेको हो।
प्रहरीका अनुसार कारभित्र लुकाइराखिएको बुप्रेनोर्फिन, डाइजेपाम र फेनारगनका १,८०० एम्पुल तथा ट्रामाडोलका ५१० क्याप्सुल बरामद गरिएको छ। घटनामा संलग्न पाँचै जना भारतीय नागरिकलाई पक्राउ गरी थप अनुसन्धान तथा कानुनी कारबाहीका लागि जिल्ला प्रहरी कार्यालय कास्कीमा बुझाइएको छ।
पक्राउ पर्नेहरू भारतको उत्तर प्रदेश, गोरखपुर क्षेत्रका २७ वर्षीय विकास कुमार, २९ वर्षीय बर्जली पासवान, ३३ वर्षीय अभय कुमार मिश्र, ३३ वर्षीय प्रीतम कुमार र २५ वर्षीय अभिषेक कुमार पासवान रहेका छन्।
प्रहरीले लागूऔषधसँगै भारतीय नम्बर प्लेटको कार, पाँच थान मोबाइल फोनसमेत बरामद गरेको जनाएको छ।
लागूऔषध नियन्त्रण ब्यूरोले लागूऔषध ओसारपसार र कारोबारविरुद्धको अभियानलाई निरन्तर तीव्र बनाइएको जनाएको छ।
