आत्मदाहको प्रयास गरेका विवेक यादवको उपचारका क्रममा निधन
काठमाडौं, असार ३० — आत्मदाहको प्रयास गरेका सर्लाहीका विवेक यादवको उपचारका क्रममा निधन भएको छ।
कीर्तिपुरस्थित बर्न अस्पतालका निर्देशक डा. किरण नकर्मीका अनुसार यादवको सोमबार राति करिब २ बजे उपचारकै क्रममा मृत्यु भएको हो।
गम्भीर अवस्थामा रहेका यादवलाई शुक्रबार हेलिकप्टरमार्फत काठमाडौं ल्याई साँझ करिब ७:३० बजे कीर्तिपुरस्थित बर्न अस्पतालमा भर्ना गरिएको थियो। उनले आफ्नै शरीरमा पेट्रोल छर्केर आगो लगाएका थिए।
आफन्तका अनुसार बायोलोजी विषयमा एमएस्सी गरेका विवेक विगत करिब एक वर्षदेखि मानसिक तनावमा रहेका थिए।
यसअघि राहदानी विभाग अगाडि आत्मदाहको प्रयास गरेका मुगुका गणेश नेपालीको पनि उपचारका क्रममा शुक्रबार निधन भएको थियो। त्यसैगरी, गत शनिबार काठमाडौंको बुद्धनगरमा आत्मदाहको प्रयास गरेका अश्विन बस्नेतको सोही दिन मृत्यु भएको थियो।
