श्रीमतीको कुटपिटपछि मृत्यु, श्रीमान् पक्राउ
कञ्चनपुर । कञ्चनपुरको दोधारा चाँदनी नगरपालिका–१० फगिरे चौराहामा श्रीमतीलाई कुटपिट गरी हत्या गरेको आरोपमा एक जना पक्राउ परेका छन्।
पक्राउ पर्नेमा स्थानीय अन्दाजी ४५ वर्षीय रनबहादुर सुनार रहेका छन्। उनले आफ्नी ४२ वर्षीया श्रीमती पारु सुनारलाई कुटपिट गरी गम्भीर घाइते बनाएको प्रहरीले जनाएको छ।
घाइते पारुलाई उपचारका लागि दोधारा चाँदनी अस्पताल लगिएको थियो। अस्पतालमा प्रारम्भिक उपचारपछि अवस्था गम्भीर रहेको भन्दै चिकित्सकले सुविधासम्पन्न अस्पतालमा रिफर गरेका थिए। तर, उनलाई थप उपचारका लागि अन्यत्र नलगिई घरमै राखिएको र सोही क्रममा उनको मृत्यु भएको प्रहरीले जनाएको छ।
घटनामा संलग्न रनबहादुर सुनारलाई प्रहरीले नियन्त्रणमा लिई घटनाबारे थप अनुसन्धान गरिरहेको छ।
