कानेपोखरीको सावायोहाङ किराँत मन्दिरबाट चोरी, तीन जना पक्राउ
विराटनगर । मोरङको कानेपोखरी गाउँपालिका–५ स्थित सावायोहाङ किराँत महिम मन्दिरबाट चोरी गरेको आरोपमा प्रहरीले तीन जनालाई पक्राउ गरेको छ।
जिल्ला प्रहरी कार्यालय मोरङका अनुसार साउन १ गते राति करिब ११ बजे कानेपोखरी चोकमा अस्थायी प्रहरी चौकी कानेपोखरीबाट खटिएको टोलीले सवारी चेकजाँचका क्रममा तीन जनामाथि शंका लागेपछि सोधपुछ तथा अनुसन्धान गरेको थियो।
अनुसन्धानका क्रममा उनीहरूको साथबाट नगद ६६५ रुपैयाँ, को ३४ प ५७७९ नम्बरको स्कुटर, ६२ थान ढकी डलर, ६० थान तामाका कलश, १२ थान घण्टी, ४६ थान तामाका दियो, ३ थान तामाका थाली, १ थान पिलास, १ थान फलामको ह्याम्बर तथा ताला फुटाउन प्रयोग हुने १ थान फलामको रड बरामद गरिएको प्रहरीले जनाएको छ।
बरामद सामग्रीबारे सोधपुछ गर्दा उनीहरूले कानेपोखरी–५ स्थित सावायोहाङ किराँत महिम मन्दिरबाट चोरी गरी ल्याएको खुलेको प्रहरीले जनाएको छ।
पक्राउ पर्नेहरू उर्लाबारी नगरपालिका–७ का २६ वर्षीय विवेक विश्वकर्मा, ३१ वर्षीय दिवस दर्जी र १८ वर्षीय अर्जुन दर्जी रहेका छन्।
उनीहरूलाई नियन्त्रणमा लिएर इलाका प्रहरी कार्यालय पथरीमा राखी घटनाबारे थप अनुसन्धान भइरहेको जिल्ला प्रहरी कार्यालय मोरङले जनाएको छ।
