जिप दुर्घटना, चालक सहित ९ जना घाइते
बाजुरा, साउन ४ — बाजुराको हिमाली गाउँपालिका–५ क्युडीस्थित कुवाडी–क्युडी भित्री कच्ची सडकखण्डमा सोमबार जिप दुर्घटना हुँदा चालकसहित ९ जना घाइते भएका छन्।
सोमबार दिउँसो करिब १:२५ बजे सुदूरपश्चिम प्रदेश सु.प्र.प्र. ०१–००१ ज १८७८ नम्बरको जिप सडकको माथिल्लो मोडबाट करिब १० मिटर तल खसेपछि दुर्घटना भएको प्रहरीले जनाएको छ।
दुर्घटनामा जिप चालक हिमाली गाउँपालिका–२ नातीखोला निवासी २५ वर्षीय जनवीर बुढा सहित ९ जना घाइते भएका छन्। घाइतेमध्ये चार जनाको अवस्था मध्यम र पाँच जनाको अवस्था सामान्य रहेको छ।
घाइतेहरूमा धर्मलाल बुढा (४०), मिजरा बुढा (३१), हुम्लाको ताजाकोट गाउँपालिका–५ का अम्मर सिंह बुढा (४०), अस्मिता थापा (२०), जंग सिंह बुढा (२८), गोरख रोकाया (२०), लोकेन्द्र बुढा (२७) र ९ वर्षीया सुस्मा बुढा रहेका छन्।
प्रहरीका अनुसार सबै घाइतेलाई उपचारका लागि अस्पताल पठाउने तयारी भइरहेको छ। दुर्घटनाको कारणबारे प्रहरीले थप अनुसन्धान गरिरहेको जनाएको छ।
