घरमाथिबाट पहिरो खस्दा बाजुराका १३ घरधुरी विस्थापित, ८३ जना सुरक्षित स्थानमा सारिए
बाजुरा । अविरल वर्षासँगै आएको पहिरोका कारण बाजुराको बडिमालिका नगरपालिका–९ सेलागाडका १३ घरधुरी जोखिममा परेपछि स्थानीयलाई सुरक्षित स्थानमा स्थानान्तरण गरिएको छ। तीमध्ये तीन घरधुरी बस्नै नमिल्ने गरी उच्च जोखिममा पुगेका छन्।
शुक्रबार बिहान करिब ४:३५ बजे घरमाथिबाट पहिरो खसेर बस्ती जोखिममा परेको सूचना प्राप्त भएपछि जिल्ला प्रहरी कार्यालय बाजुराबाट खटिएको प्रहरी टोली घटनास्थल पुगेर प्रभावित परिवारको उद्धार गरेको हो। प्रहरीले १३ घरधुरीमा बसोबास गर्ने ८३ जना सदस्यलाई अन्नपात, लत्ताकपडा, भाँडावर्तन तथा अन्य आवश्यक सरसामानसहित सुरक्षित स्थानमा सारेको जनाएको छ।
उद्धारका क्रममा स्थानीय प्रेम थापाकी ३० वर्षीया श्रीमती पार्वती थापा बेहोस भएकी थिइन्। उपचारपछि उनको स्वास्थ्य अवस्था सुधार भई अस्पतालबाट डिस्चार्ज गरिएको प्रहरीले जनाएको छ।
यसैबीच, पहिरोका कारण बडिमालिका नगरपालिका–८ राप्कास्थित टोट्के सिँचाइ नहरमा पनि क्षति पुगेको छ। पहिरोले २०० एमएम क्षमताको करिब २३० मिटर प्लास्टिक पाइप तथा २५ मिटर पक्की नहर बगाएको छ।
प्रभावित क्षेत्रमा थप पहिरोको जोखिमलाई मध्यनजर गर्दै सुरक्षा निकायले निगरानी बढाएको तथा स्थानीयलाई आवश्यक सतर्कता अपनाउन आग्रह गरेको छ।
