हवाई फायरपछि ९५ ग्रामभन्दा बढी ब्राउन सुगरसहित दुई भारतीय पक्राउ
धनुषा — भारतबाट नेपालमा लागूऔषध भित्र्याएर बिक्री–वितरण गर्दै आएको आशंकामा दुई भारतीय नागरिकलाई प्रहरीले हवाई फायर गरी पक्राउ गरेको छ।
लागूऔषध नियन्त्रण ब्यूरो, कोटेश्वरका अनुसार भारतबाट नेपालमा सञ्चालन हुने लागूऔषध कारोबारमा संलग्न गिरोहमाथि निगरानी गर्ने क्रममा ब्यूरोको शाखा कार्यालय बर्दिबासबाट खटिएको प्रहरी टोलीले शुक्रबार धनुषाको मिथिला नगरपालिका–६ मा कारबाही गरेको हो।
प्रहरीका अनुसार लागूऔषध खैरो हेरोइन (ब्राउन सुगर) को कारोबार भइरहेको अवस्थामा दुई जनालाई नियन्त्रणमा लिन खोज्दा उनीहरू भाग्न खोजेपछि रोक्न चेतावनीस्वरूप एक राउण्ड हवाई फायर गरिएको थियो। त्यसपछि दुवैलाई नियन्त्रणमा लिइएको प्रहरीले जनाएको छ।
पक्राउ पर्नेमा भारतको मधुवनी जिल्ला निवासी २८ वर्षीय सन्तोष कुमार महत्तो र ४५ वर्षीय मिथिलेश साहु रहेका छन्।
उनीहरूको साथबाट ९५ ग्राम ५९० मिलिग्राम खैरो हेरोइन, दुई थान मोबाइल, एक थान भारतीय आधार कार्ड र एक थान भारतीय सवारी चालक अनुमतिपत्र बरामद भएको ब्यूरोले जनाएको छ।
पक्राउ परेका दुवै जनालाई बरामद लागूऔषधसहित थप अनुसन्धान तथा कानुनी कारबाहीका लागि इलाका प्रहरी कार्यालय ढल्केवर, धनुषामा बुझाइएको छ।
