जिप दुर्घटना हुंदा ९ जना घाइते, एकको अवस्था गम्भीर
रोल्पा । रोल्पाको त्रिवेणी गाउँपालिका–५ हान्जाबाङस्थित सडकमा जिप दुर्घटना हुँदा ९ जना घाइते भएका छन्। घाइतेमध्ये एक जनाको अवस्था गम्भीर रहेको प्रहरीले जनाएको छ।
गंगादेव गाउँपालिका–१ भुर्तिबाट तुलसीपुरतर्फ जाँदै गरेको लु १ ज १७४३ नम्बरको जिप चालक गंगादेव गाउँपालिका–१ निवासी अन्दाजी २२ वर्षीय दिलकुमार वलीले चलाइरहेका बेला जिप अनियन्त्रित भई सडकबाट करिब १५ मिटर तल खोल्सामा खस्दा दुर्घटना भएको हो।
जिपमा चालकसहित १० जना सवार रहेका थिए। दुर्घटनापछि घाइतेहरूको उद्धार गरी जुगार स्वास्थ्य चौकी, रोल्पामा प्रारम्भिक उपचार गरिएको थियो। त्यसपछि थप उपचारका लागि सबै घाइतेलाई दाङस्थित राप्ती प्रादेशिक अस्पताल, तुलसीपुर पठाइएको प्रहरीले जनाएको छ।
दुर्घटनामा सहचालक गंगादेव गाउँपालिका–१ निवासी २४ वर्षीय चित्रराम वली गम्भीर घाइते भएका छन्। अन्य घाइतेहरूमा धर्मराज डाँगी (४१), सुपुरी डाँगी (७७), पलबहादुर घर्तीमगर (२३), मनिका डाँगी (२८), उनका ४ वर्षीय छोरा प्रदीप डाँगी, पृथ्वी पुन मगर (२५), हरि वली (२८) तथा भारतको मोतिहारी जिल्ला निवासी २५ वर्षीय सन्तोष सहनी रहेका छन्।
प्रहरीले जिप चालक दिलकुमार वलीलाई नियन्त्रणमा लिई दुर्घटनाबारे थप अनुसन्धान गरिरहेको जनाएको छ।
