बाढी प्रभावित जिल्लामा सम्पर्कविहीन नागरिकको विवरण उपलब्ध गराउन धनकुटा प्रहरीको आग्रह
धनकुटा । हालैको बाढी तथा पहिरोका कारण रसुवा, नुवाकोट, धादिङ, चितवन, तनहुँ लगायतका प्रभावित जिल्लामा सम्पर्कविहीन वा जोखिममा रहेका धनकुटाका नागरिक तथा प्रहरी कर्मचारीको विवरण उपलब्ध गराउन जिल्ला प्रहरी कार्यालय धनकुटाले आग्रह गरेको छ।
प्रहरीले प्रभावित क्षेत्रमा रहेका वा सम्पर्कविहीन व्यक्तिहरूको नाम, ठेगाना, सम्पर्क नम्बर तथा परिवार वा आफन्तको विवरण उपलब्ध गराउन अनुरोध गरेको हो।
प्राप्त विवरणका आधारमा प्रभावित व्यक्तिहरूको खोज तथा उद्धार कार्यमा सहजीकरण हुने प्रहरीले जनाएको छ। यसका लागि सम्बन्धित परिवार, आफन्त वा जानकारी भएका व्यक्तिले जिल्ला प्रहरी कार्यालय धनकुटा वा नजिकको प्रहरी कार्यालयमा तत्काल सूचना दिन आग्रह गरिएको छ।
बाढी तथा पहिरोका कारण विभिन्न जिल्लामा यातायात तथा सञ्चार सम्पर्क प्रभावित भइरहेका बेला धनकुटा प्रहरीले आफ्ना जिल्लाका नागरिक तथा प्रहरी कर्मचारीको अवस्थाबारे जानकारी संकलन थालेको हो।
