अविरल वर्षा र पहिरोले देशका विभिन्न राजमार्ग अवरुद्ध
काठमाडौं, १८ भदौ । अविरल वर्षा, बाढी र पहिरोका कारण देशका विभिन्न प्रदेशका मुख्य राजमार्ग तथा सडक खण्डहरू पूर्ण रूपमा अवरुद्ध भएका छन्। नेपाल प्रहरीले आज बिहान ६:३५ बजेसम्मको अद्यावधिक विवरण सार्वजनिक गर्दै यात्रुहरूलाई उच्च सतर्कता अपनाउन र सम्भव भएसम्म वैकल्पिक मार्गको प्रयोग गर्न अनुरोध गरेको छ।
प्रहरीका अनुसार काठमाडौं-धादिङ सीमास्थित चन्द्रागिरी नगरपालिका-२ चिसापानीमा खसेको पहिरो हटाइ सडक एकतर्फी रूपमा सुचारु गरिएको छ। त्यस्तै सुरक्षालाई मध्यनजर गर्दै बीपी राजमार्गको खुर्कोट-नेपालथोक-कटुन्जेबेँसी खण्डमा रात्रिकालीन सवारी सञ्चालनमा रोक लगाइएको छ। उक्त खण्डमा बिहान ४ बजेदेखि साँझ ६ बजेसम्म परिस्थितिको मूल्याङ्कन गरेर मात्रै सवारी साधन चलाउन दिइने प्रहरीले जनाएको छ।
यसैगरी रसुवाको उत्तरगया गाउँपालिका-५ खाल्टेमा बाढी आएका कारण त्रिशूली-मैलुङ-स्याफ्रुबेँसी सडक खण्ड पूर्ण रूपमा ठप्प बनेको छ। उता टोखा-छहरे सडक खण्डअन्तर्गत शिवपुरी गाउँपालिका-८ घट्टेखोलामा पनि सम्भावित जोखिम टार्न राति १० बजेदेखि बिहान ५ बजेसम्म सवारी साधन सञ्चालनमा प्रतिबन्ध लगाइएको छ।
