गोरखामा बुढीगण्डकीको बाढीले दुई झोलुङ्गे पुल र एक फलामे पुल बगायो, घरहरूमा क्षति
गोरखा । गोरखाको चुमनुब्री गाउँपालिका–६ लोक्पा र चुम्लिङबीच पहिरो खस्दा थुनिएको बुढीगण्डकी नदीमा आएको बाढीले विभिन्न स्थानमा क्षति पुर्याएको छ। बाढीले दुईवटा झोलुङ्गे पुल र एउटा फलामे पुल बगाउनुका साथै घर तथा टहरामा क्षति पुर्याएको विवरण प्राप्त भएको छ।
प्राप्त विवरणअनुसार चुमनुब्री गाउँपालिका–३ न्याकचेतस्थित न्याकचेतबाट सिर्दिबास जोड्ने पुरानो झोलुङ्गे पुल बाढीले बगाएको छ। सोही वडाको सिर्दिबास निवासी रामबहादुर गुरुङको एउटा कच्ची घर बगाएको छ भने अर्को घरमा बाढी पसेको छ।
त्यस्तै, धार्चे गाउँपालिका–५ माछिखोलाबाट केरौजा जोड्ने झोलुङ्गे पुल पनि बाढीले बगाएको छ। माछिखोलाको तल्लो बस्तीमा बाढी पस्दा पाँचदेखि सातवटा घर र पाँचदेखि सातवटा टहरामा पानी पसेको छ।
धार्चे गाउँपालिका–३ सल्लेरीमा २० देखि २२ वटासम्म घर जोखिममा रहेका छन्। यस्तै, आरुघाट गाउँपालिका–२ र ३ जोड्ने सोतीस्थित फलामे पक्की पुलसमेत बाढीले बगाएको छ।
बुढीगण्डकी नदीमा आएको बाढीका कारण विभिन्न बस्ती तथा भौतिक संरचनामा क्षति पुगेको छ। जोखिममा रहेका बस्तीका बासिन्दाको सुरक्षाका लागि सतर्कता अपनाउनुपर्ने देखिएको छ।
क्षतिको थप विवरण तथा मानवीय क्षतिबारे भने यस विवरणमा खुलाइएको छैन।
