उदयपुरमा ७ हजार ८२६ किलोभन्दा बढी गाँजा सहित ट्रक नियन्त्रणमा
उदयपुर, कात्तिक १७ गते। उदयपुरको बेलका नगरपालिका–८ मैनामैनीबाट प्रहरीले ७ हजार ८२६ किलो ८१० ग्राम गाँजासहित एउटा ट्रक नियन्त्रणमा लिएको छ।
कात्तिक १५ गते बेलुका विशेष सूचनाका आधारमा सशस्त्र प्रहरी बल नेपाल सुरक्षा बेस रामपुर, उदयपुरबाट खटिएको टोलीले मैनामैनी–कोठु भित्री सडकखण्डमा प्रदेश १–०२–००२ ख ०२०६ नम्बरको ट्रक रोकेर चेकजाँच गरेको थियो।
चेकजाँचका क्रममा ट्रकमा कालो प्लास्टिकले छोपेर २४६ वटा प्लास्टिकका बोरामा प्याक गरी लोड गरिएको अवस्थामा उक्त परिमाणको गाँजा बरामद भएको प्रहरीले जनाएको छ।
बरामद गाँजा र ट्रक आवश्यक कानुनी कारबाहीका लागि इलाका प्रहरी कार्यालय रामपुर ठोक्सिलामा बुझाइएको छ।
ट्रकमा गाँजा बरामद भएपछि यसको ओसारपसारमा संलग्न चालक तथा अन्य व्यक्तिहरूको खोजी भइरहेको र घटनाबारे थप अनुसन्धान जारी रहेको प्रहरीले जनाएको छ।
