दुई मोटरसाइकल ठोक्किँदा एक जनाको मृत्यु, तीन गम्भीरसहित चार जना घाइते
बर्दिया । बर्दियाको बाँसगढी नगरपालिका–५ मोतिपुर जंगलस्थित भित्री सडकखण्डमा दुई मोटरसाइकल एकआपसमा ठोक्किँदा एक जनाको मृत्यु भएको छ भने तीन जना गम्भीरसहित चार जना घाइते भएका छन्।
दुर्घटनामा परी मृत्यु हुनेमा गुलरिया नगरपालिका–११ निवासी २४ वर्षीय ओमकार थारु रहेका छन्। दुर्घटनामा गम्भीर घाइते भएका थारुलाई थप उपचारका लागि भारतको लखनउ लैजाने क्रममा मृत्यु भएको हो।
प्रहरीका अनुसार हिजो दिउँसो करिब १ बजे भे ५ प ९१६१ नम्बरको मोटरसाइकल र विपरीत दिशाबाट आउँदै गरेको भे ११ प ८५६७ नम्बरको मोटरसाइकल एकआपसमा ठोक्किएका थिए।
दुर्घटनामा भे ११ प ८५६७ नम्बरको मोटरसाइकल चालक बारबर्दिया नगरपालिका–३ बानियाभार निवासी २५ वर्षीय आशिष थारु गम्भीर घाइते भएका छन्। सोही मोटरसाइकलमा पछाडि सवार बाँसगढी नगरपालिका–७ निवासी १८ वर्षीय रमन थारु सामान्य घाइते भएका थिए। उनको कौशिल्या अस्पताल बाँसगढीमा उपचारपछि डिस्चार्ज भइसकेको छ।
त्यस्तै, भे ५ प ९१६१ नम्बरको मोटरसाइकल चालक भारतको लौकाइ निवासी १८ वर्षीय सहाबुदिन खान र पछाडि सवार २०/२२ वर्षीय जमाल खान पनि गम्भीर घाइते भएका छन्।
घाइतेहरूको टाउको, अनुहार तथा शरीरका विभिन्न भागमा चोट लागेको प्रहरीले जनाएको छ।
दुर्घटनामा संलग्न दुवै मोटरसाइकल प्रहरीले नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।
