रौतहटको गौर सीमा क्षेत्रबाट २७ थान गोली बरामद
रौतहट, २ मंसिर। रौतहटको गौर नगरपालिका–१ स्थित कानुपट्टी सीमा क्षेत्रमा बेवारिसे अवस्थामा २७ थान गोली फेला परेका छन्।
सशस्त्र प्रहरी बलको संयुक्त गस्ती टोलीले मंगलबार राति सीमा क्षेत्रमा नियमित गस्ती गर्ने क्रममा ९ एमएम पेस्तोलमा प्रयोग हुने जस्तो देखिने उक्त गोली बरामद गरेको हो।
सशस्त्र प्रहरी बल नेपाल नम्बर ११ गण हेडक्वार्टर रौतहटका अनुसार, सीमा सुरक्षा गुल्म हेडक्वार्टर गौर र भन्सार सुरक्षा गार्ड गौरबाट खटिएको संयुक्त टोलीले कानुपट्टी सीमा क्षेत्रमा शंकास्पद अवस्थामा रहेको सेतो प्लास्टिकको झोला जाँच गर्दा सो परिमाणमा गोली भेटिएको हो।
सीमा क्षेत्रमा बेवारिसे अवस्थामा गोली फेला परेएपछि सुरक्षा निकायले यस घटनालाई गम्भीर रूपमा लिएको छ। बरामद गरिएका गोली कसले र कुन प्रयोजनका लागि त्यहाँ छाडेको हो भन्ने विषयमा थप अनुसन्धान भइरहेको छ।

