महिलाकै भरमा पार्टीहरुको चुनावी घरदैलौ
इनरुवा । मुलुकको राजनीतिमा महिला पुरुष भन्दा पछि नै रहेपनि आसन्न स्थानीय तहको निर्वाचनमा दलहरुको चुनावी माहौल तताउने काममा भने महिलाहरु सबैभन्दा अग्रपंक्तिमा देखिएका छन ।
जेठ महिनाको चर्को घाम र गर्मीको प्रवाह नगरी स्थानीय निकायको निर्वाचनमा दलका नेता कार्यकर्ताहरु भन्दा अग्रपंक्तिमा स्थानीय महिलाहरु जागरुक भएर चुनावी माहौल तताउन लागेका छन ।
प्रमुख दलहरुले जिल्लामा जारी राखेको घरदैलोमा अग्रपंक्तिमा महिलाहरु रहने मात्रै होईन, संख्यात्मक हिसावमा पनि महिलाहरुकै उपस्थिति प्रधान रहँदै आएको छ । लाग्छ महिलाहरु सक्रिय नभए दलहरुको घरदैलौ नै नहुन सक्छ ।
असार १४ अर्थात दोस्रो चरणको स्थानीय तह निर्वाचन हुने दिन । मतदान गर्ने दिन नजिकिँदै गर्दा यतिबेला सुनसरीमा चुनावी सरगर्मी निकै बढेको छ ।
राजनैतिक दलहरुले आ–आफ्नो चुनावी प्रचारलाई तिव्रता दिइरहेका छन् । अधिकांशजसो दलले सुनसरीमा पार्टीका आफ्ना उम्मेदवार टुङगो लगाइसकेका छन् ।
इनरुवामा नेकपा एमाले, कांग्रेस, माओवादी केन्द्रले यतिबेला घरदैलो कार्यक्रमलाई अघि बढाइरहेका छन् । एमाले र कांग्रेसको घरदैलोमा सहभागि स्थानीय नेता तथा कार्यकर्ताको उपस्थिती बाक्लो छ ।
पार्टीको चुनाव चिन्ह अंकित भेष्ट, टोपीमा सजिएर चुनावी नारामा लय मिलाउँदै प्रचारमा जुट्ने मात्रै नभएर नृत्यले सर्वसाधारणको ध्यान आफ्नो पार्टीका उम्मेदवारतर्फ केन्द्रित गराउनसमेत महिलाहरु अग्रपंक्तिमा देखिएका छन् ।
चर्को घाम नभनी आ–आफ्नो चुनावी एजेण्डासहित घरदैलो कार्यक्रममा आफ्ना उम्मेदवारलाई साथ र हौसला प्रदान गर्न महिला सहभागिताको निक्कैनै महत्वपूर्ण स्थान रहेको सम्वन्धित पार्टीका नेताहरु स्विकार गर्छन । चुनावी प्रचारमा दिनानुदिन कार्यकर्ता जुट्दै जाँदा महिला सहभागि समेत थपिदों छ । जसलाई पार्टीपंक्ति जनलहर आ–आफ्नो पक्षमा रहेको दावी गर्दै आएका छन् ।
