जबरजस्ती करणी मुद्दामा फरार युवा खसी चोरीमा पक्राऊ
विराटनगर, बैशाख २२ । जबरजस्ती करणी उद्योग मुद्धामा जेल सजाय तोकिए पनि फरार रहेका विराटनगरका एक युवा खसी चोरी काण्डमा पक्राउ परेका छन् ।
विराटनगर १ का ३० वर्षीय कलशराज गिरी बुढीगंगा गाउँपालिका ३ की कल्पना राजवंशी महिलाको खसी चोरी गरेको घटनामा पक्राउ परेका हुन् । खसी चोरी गरेर स्कुटरमा हालेर लैजाँदै गरेको अवस्थामा उनलाई प्रहरीले पक्राउ गरेको थियो । मोरङ प्रहरी प्रमुख एसपी सन्दीप भण्डारीका अनुसार चोरी मुद्धामा म्याद थप गरेर अनुसन्धान सुरु गरिएपछि उनी जवरजस्ती करणी उद्योग मुद्धामा जेल सजाय सुनाइएको थियो ।
अन्नपूर्ण पोष्ट समाचार अनुसार २०७३ मंसिर २८ गते विराटनगर १ की ३६ वर्षीय महिलालाई जवरजस्ती करणी गर्न खोजेको भन्दै प्रहरीले गिरीविरुद्ध जवरजस्ती करणी उद्योगको मुद्धा चलाएको थियो । तर उनी घटना लगत्तै फरार थिए । पक्राउ नपरे पनि अदालतले उनलाई तीन वर्ष कैदको फैसला सुनाएर प्रहरीलाई तत्काल पक्राउ गर्न आदेश दिएको थियो ।
‘खसी चोरी गरेको घटनामा फेला नपारिएको भए उनलाई पक्राउ गर्न प्रहरीलाई गाह्रो पर्ने थियो,’ एसपी भण्डारीले भन्नु भयो, ‘जवरजस्ती करणी उद्योग गरे यता भने उनी फरार थिए ।’ चोरी मुद्धामा जिल्ला अदालत मोरङले गिरीसंग १० हजार रुपैयाँ धरौटी माग गरेको छ । धरौटी माग गरिएको रकम बुझाए पनि उनलाई शुक्रबार जवरजस्ती करणी उद्योग मुद्धाको सजाय भुक्तानका लागि कारागार चलान गरिएको छ ।
