सरकारले हुन्छ भने धुर्मुस–सुन्तलीको ‘नमुना नेपाल’ ललितपुरमा निर्माण हुने ! तर…
काठमाडौं, साउन १७ । हास्य कलाकारद्वय सीताराम कट्टेल ‘धुर्मुस’ र कुञ्जना घिमिरे ‘सुन्तली’को विकासका लागि महत्वाकांक्षी योजना ‘नमुना नेपाल’ नेपाल सरकारले स्वीकृती दिएको अवस्थामा निर्माण हुनेछ ।
‘धुर्मुस–सुन्तली’ फाउन्डेसनको नामबाट उनीहरुले पाँच अर्ब रुपैयाँमा निर्माण गर्न लागेको उक्त योजना केही महिनाअघि नै सार्वजनिक गरेका थिए । उनीहरुका अनुसार नेपाल सरकारबाट उक्त योजनाका लागि स्वीकृती पाइसकेको छैन ।
विभिन्न जिल्लाका २२ ठाउँको अवलोकनपछि ‘अब विश्वले चिन्नेछ नेपाल, नेपालभित्रको नेपाल नमुना नेपाल’ ललितपुरको लेलेमा केन्द्रित छ । ‘नमुना नेपाल’ निर्माणका लागि ललितपुर जिल्लाको गोदावरी नगरपालिका वडा नं. ५ को लेले स्थित खाँवा डाँडा उपयुक्त सथान भएको फाउन्डेशनको ठहर छ ।
‘धुर्मुस–सुन्तली’ फाउन्डेशनले सार्वजनिक गरेको योजना अनुसार ‘नमुना नेपाल’ भित्र मिनी रेल, सांस्कृतिक संग्रहालय, स्टेडियम, प्रतीकात्मक हिमाल, लुम्बिनी, बौद्धनाथ, मुक्तिनाथ, भ्यु टावरसहितको धरहरा, पशुपति, आदि विविध सांस्कृतिक धार्मिक स्थल हुनेछन् ।
