अत्याधिक चासो रहेको जनकपुरमा मतगणना माग गर्दै मध्यरातमा नारावाजी सुरु
धनुषा, धेरै चासोपूर्वक हेरेको धनुषाको जनकपुर उपमहानगरपालिकामा अहिलेसम्म मतगणना सुरु हुन सकेको छैन । तत्काल मतगणना सुरु गर्नुपर्ने माग गर्दै गणनास्थलबाहिर विभिन्न राजनीतिक दलका कार्यकर्ता र सर्वसाधारणले नाराबाजी गरिरहेका छन् । जिल्ला निर्वाचन कार्यालयले भने मंगलबार बिहानबाट मात्र मतगणना सुरु हुने जनाएको छ ।
मतगणना सुरु गर्ने विषयमा निर्णय गर्न सोमबार बेलुकी बसेको सर्वदलीय बैठक निष्कर्षहीन भएपछि गणना कार्य सुरु हुन नसकेको हो । बेलुकीबाटै मतगणना गर्न सबै राजनीतिक दलले सहमति जनाए पनि कांग्रेसले अस्वीकार गरेको बैठकमा सहभागी प्रतिनिधिहरूले जनाएका छन् ।
कांग्रेसले भालि बिहानबाट मात्र गणना कार्य अगाडि बढाउनुपर्ने अडान राखेपछि सहमति जुट्न नसकेको हो । मुख्य निर्वाचन अधिकृत राधाकृष्ण उप्रेतीले सबैको सहमतिमा मंगलबार बिहानबाट मतगणनाको काम थालिने बताए । मतदानस्थल बाहिर भने अहिले पनि नाराबाजी भइरहको छ ।
