राप्रपा कांग्रेससँग चुनावी तालमेल गर्दै सरकारमा सहभागी हुने, गृहमन्त्रालयसहित पाँच मन्त्रालय राप्रपालाई
काठमाडौं । राष्ट्रिय प्रजातन्त्र पार्टीले कांग्रेससँग चुनावी तालमेल गर्दै सरकारमा सहभागी हुने निर्णय गरेको छ । राप्रपाको आज बसेको शीर्ष नेताहरुको बैठकले सरकारमा सहभागी हुने निर्णय गरेको बैठकमा सहभागी एक नेताले जानकारी दिए ।
उनले भने सरकारलाई समर्थन गरेको पत्र तयार हुँदैछ । प्रधानमन्त्रीलाई भेटेपछि अन्तिम टुङ्गो लाग्छ । राप्रपा सरकरामा जाने निश्चित जस्तै भइसकेको र कमल थापालाई गृहमन्त्री बनाउन प्रधानमन्त्री शेरबहादुर देउवा सकारात्मक रहेको दाबी गरिएको छ ।
गृहमन्त्रालयसहित पाँच मन्त्रालय राप्रपाले पाउने भएको छ ।
त्यस्तै राप्रपालाई चुनावी तालेमलमा प्रत्यक्षतर्फ सात सिट दिनसमेत कांग्रेस तयार भइसकेको छ । समानुपातिकतर्फ भने पछि कुरा मिलाउने सहमति भएको छ । यसअघि संविधान संशोधनको मुद्दामा दुई कित्तामा उभिएका कांग्रेस र राप्रपा नयाँ राजनीतिक गठबन्धनसँगै पुनः एक ठाउँमा उभिएका छन् ।
प्रधानमन्त्री शेरबहादुर देउवा प्रधानमन्त्री निर्वाचित हुने बेलामा देउवालाई मतदान गरेका कमल थापा पछि पार्टी फुटेसँगै चिढिएका थिए । पशुपति शमशेर राणाले पार्टी परित्याग गरेर नयाँ दल दर्ता गराएपछि कमल थापाले त्यसको दोष देउवालाई समेत लगाएका थिए ।
सरकारले नै आफ्नो पार्टी फुटाएको आशंकामा कमल थापाले संविधान संशोधनको प्रस्तावको विपक्षमा मतदान गरेका थिए । तर वाम एकताको प्रक्रिया सुरु भएसँगै लोकतान्त्रिक गठबन्धन निर्माणको अभियानका क्रममा कांग्रेस र राप्रपा पुनः नजिकिएका हुन् ।
