निर्वाचनका लागि छुट्टा-छुट्टै मतपत्र छाप्ने तयारी !
काठमाडौं । निर्वाचन आयोगले प्रत्यक्ष निर्वाचन प्रणाली अन्र्तगत आगामी प्रतिनिधिसभा र प्रदेशसभा निर्वाचनका लागि छुट्टा छुट्टै मतपत्र छाप्नेबारेमा छलफल गरेको छ । तर यसबारे भोलि सोमबार मात्रै औपचारिक निर्णय हुने आयोगले जनाएको छ ।
प्रमुख आयुक्त डा. अयोधी प्रसाद यादव सहितका पदाधिकारी रहेको आयोगको बैठकमा प्रतिनिधिसभा र प्रदेशसभाको छुट्टाछुट्टै मतपत्र छाप्ने बिषयमा छलफल भएको हो । यसबारेमा प्रतिक्रिया दिँदै आयोगका प्रवक्ता नवराज ढकालले भने, ‘यसबारेमा आयोगमा छलफल भएको छ, तर यसको निर्णय भोलि हुन्छ ।’
आयोगले भोलि अदालतको आदेश आएपछि यसबारे निर्णय गर्ने बुझिएको छ ।
सर्वोच्च अदालतले ३ दिनभित्र प्रदेश र प्रतिनिधिसभा निर्वाचनको मतपत्र छपाई बारेमा भएको प्रगतिबारे ३ दिनभित्र जवाफ दिन आयोगलाई निर्देशन दिएको थियो ।
सर्वोच्चलाई आयोगले भोलि सोमबार जवाफ दिने भएको छ । शनिवार अदालतको निर्णयको पत्र पाएको अदालतले अदालतलाई बुझाउने जवाफ आज तयार पारेको हो ।
राजपा नेता सर्वेन्दनाथ शुक्लाले प्रदेशसभा र प्रतिनिधिसभाको प्रत्यक्षतर्फको मतपत्र एउटै कागजमा दुई मतपत्र छाप्ने निर्णय भएको भन्दै अलग रुपमा छाप्न माग राखी सर्वोच्चमा रिट दायर गरेका थिए ।
रिटमाथि गत असोज १९ गते सर्वोच्चले अन्तरिम आदेश दिन नपर्ने फैसला गरेपछि आयोगले एउटै कागजमा दुई मतपत्र छाप्ने निर्णय गरेको थियो ।
सो आदेशमा समानुपातिकतर्फ मतपत्र छापिसकेकाले अदालतले अलगअलग मतपत्र छाप्नुपर्ने व्यवस्था भएको र यही कात्तिक १० गतेबाट मतपत्र छापिने भएकाले संवैधानिक र कानूनी प्रावधान गम्भीरतापूर्वक लिने भएकाले अन्तरिम आदेश दिनुपरेन भन्ने उल्लेख थियो ।
फेरि गत मंगलबार नेता शुक्लाले आयोगले अदालतको अवहेलना गरेको भन्दै दायर गरेको मुद्धामा न्यायधिश डम्बरबहादुर शाहीको एकल इजलासले बुधबार ३ दिनभित्र प्रदेश र प्रतिनिधिसभाको छुट्टाछुट्टै मतपत्र छपाईको प्रक्रिया कहाँ पुग्यो भन्नेबारेको बिबरण पेश गर्न आयोगलाई आदेश दिएको थियो ।
सर्वोच्च अदालतको यस्तो आदेश आएपछि बामगठबन्धनभित्र चुनाव सार्ने कसरत भएको आंशका बढेको थियो ।
