घोडा चढेर मतदातालाई धन्यवाद दिन हिडेपछि विवादमा तानिए नवराज सिलवाल !
काठमाडौं, एमालेबाट ललितपुर–१ का नवनिर्वाचित सांसद नवराज सिलवाल घोडा चढेर मतदातालाई धन्यवाद दिन हिंडेकामा विवादमा तानिएका छन् ।
निार्वचनमा मतदाताको मन जित्न धान काटेको तस्वीर फेसबुकमा राखेर चर्चामा आएका सिलवाल चुनाव जितेलगत्तै घोडा चडेर मतदातालाई धन्यवाद दिँदै हिंडेका छन् । उनकै शुभेच्छुकले घोडा चढेको तस्वीर फेसबुकमा सार्वजनिक गरेका थिए । तस्वीरमा सिलवाल घोडामाथि छन् भने कार्यकर्ता पैदले हिंडेको देखिन्छ । घोडा चढेको विषयमा सामाजिक सञ्जालमा सिलवालकै विरोध भएको छ ।
राजधानी दैनिकका सम्पादक डिल्ली आचार्यले सामाजिक सञ्जाल फेसबुकमार्फत चुनावअघि धान काट्न खेतमा जाँगर दिने यी हातगोडा एकाएक के भए माननीय नवराज सिलवाल ज्यू ? भन्दै सिलवालको आलोचना गरेका छन् ।
आचार्यले भनेका छन्, ‘सुहाएन माननीय ज्यू । माननीयले यसो नगरौं, कार्यकर्ताले यसो गर्न नउक्साऔं ।’
पत्रकार खगेन्द्र पन्तले आफ्नो फेसबुकमा सिलवालले चुनावअघि धान काटेको र चुनाव जितेपछि घोडा चढेको दुवै तस्वीर पोस्ष्ट गरेर उनको उछितो काढेका छन् ।
‘नयाँ मुल्लाहले प्याज धेरै खान्छ भन्थे, हो रैछ । भोट माग्न जाँदा मतदाताको खेतमा धान काटेको नाटक गरेका माननीय नवराज सिलवाल जितेपछि मतदातालाई धन्यवाद दिन राजसी ठाँटसहित यसरी गाउँ पसेछन् । यिनले जनताको भलो नगरे कसले गर्ला ?’, पत्रकार महासंघका पूर्वकेन्द्रीय सदस्यसमेत रहेका पन्तले लेखेका छन् ।
