चुनावमा गठबन्धन गरेका दुई मधेस केन्द्रित दलहरुबीच विवाद सुरु, सरकार बनाउने समयमा अलगिने भयो
काठमाडौं । चुनावमा गठबन्धन गरेका दुई मधेस केन्द्रित दलहरुबीच विवाद सुरु भएको छ । निर्वाचनमा संघीय समाजवादी फोरम र राष्ट्रिय जनता पार्टी नेपालबीच गठबन्धन बनेपनि सरकार बनाउने समयमा भने अलगिने भएका छन् ।
संघीय समाजवादी फोरमले प्रदेश नम्बर २ मा सरकार बनाउनका लागि छुट्टै तयारी थालेपछि संघीय फोरम र राजपाबीच विवाद देखिएको हो । प्रदेश नम्बर २ मा दुई दल जोडिदा सरकार गठनका लागि बहुमत पुग्छ ।
तर मुख्य मन्त्री बनाउने विषयमा दुई दलबीच विवाद भएपछि अब संघीय फोरमले सरकार गठनका लागि अन्य दलको साहारा लिने संकेत गरेको छ । संघीय समाजवादी फोरमका अध्यक्ष उपेन्द्र यादवले न्युज २४ टेलिभिजनसँगको फोन सम्पर्कमा आफूहरुले प्रदेश सरकार गठनका लागि सबै दलसँगको सहकार्यलाई खुल्ला राखेको जानकारी दिनुभयो ।
उहाँले कुनै एक दलसँगमात्र गठबन्धन हुने भन्नेमा आफूहरु नरहेको भन्दै राजपासँग मिलेर सरकार नबनाउने संकेत गर्नुभयो । यता राजपाले भने संघीय फोरमसँग मिलेरै सरकार बनाउने बताउँदै आएको छ ।
