प्रधानमन्त्री देउवा असफल भएको भएको भन्दै प्रकाशमानले मागे राजिनामा, कारबाहीको धम्की नदिन चेतावनी
काठमाण्डौ, ५ माघ । नेपाली कांग्रेसका पूर्व महामन्त्री प्रकाशमान सिंहले पार्टी सभापति शेरबहादुर देउवाको राजिनामा मागेका छन् । सिंहले आजको केन्द्रिय समिति बैठकमा बोल्दै चुनावमा कांग्रेसले हार्नुको प्रमुख जिम्मेवारी सभापति लिनुपर्ने र राजिनामा दिएर नेतृत्व हस्तान्तरण गर्नुपर्ने माग गरेका हुन् ।
तपाईको नेतृत्व असफल भएको छ, समानुपातिकको भोट देखाएर उम्किन पाउनुहुन्न भनेर सिंहले देउवालाई दबाब दिएका थिए ।
देउवा लगायत उनका पक्षधरहरुले समानुपातिकमा कांग्रेसको मत नघटेको उदाहरण दिदै प्रत्यक्षतर्फ हार्नुको कारण व्यक्तिगत रुपमा हारेका नेताहरुले नै लिनुपर्ने तर्क गर्दै आएका छन् ।
तर सिंहले भने हारेका नेतालाई व्यक्तिगत रुपमा जिम्मेवार बनाएर सभापति उम्कन नमिल्ने बताएका छन् ।
सिंहले अनुशासन कारबाहीको धम्की नदिन पनि देउवालाई चेतावनी दिएका छन् ।
प्रधानमन्त्री निवास बालुवाटारमा शुक्रबार बसेको बैठकमा सिंहले देउवामाथि पार्टीम मनपरी गरेको र २–४ जना नेतालाई लिएर हिँडेको आरोपसमेत लगाए । सुजाता कोइरालाबाहेक अरुलाई समानुपातिकमा नदोर्होयाउने केन्द्रीय कार्यसमितिको निर्णय भएपनि त्यसलाई उल्लंघन गरेको उनको आरोप छ ।
‘पार्टी बैठकमा, बाहिर कस्तो बोल्यो भनेर अनुशासनको कारबाहीको डर धम्की दिने काम नगर्नुहोला’ उनले भनेका छन्, ‘हामी पनि पञ्चायती व्यवस्थाविरुद्ध लडेका हौं । तपाईदेखि डराउने कुनै छैन ।’
नेता शेखर कोइरालाले संसदीय समितिमा नबस्ने घोषणा गरे । रामचन्द्र पौडेल पक्षीय नेताहरुले विधान विपरित भएको भन्दै संसदीय समिति भंग गर्न माग गरेका छन् ।
शुक्रबारको बैठकमा बलबहादुर केसी, बालकृष्ण खाँडल बद्री पाण्डे लगायतले बोलेका थिए । बैठक अपराहृन ४ बजे बस्ने गरी स्थगित भएको छ ।
देउवा पक्षले चाँही आरोप प्रत्यारोप गरेर नगरी पार्टीलाई बलियो बनाउनुपर्ने तर्क गरेका थिए । सभापतिलाई मात्रै दोष दिन नहुनेमा देउवा पक्षिय नेता बालकृष्ण खाँडले जोड दिएका छन् । – रिपोर्टर्स नेपाल
