साकार भएन ‘पानी सपना’ : खानेपानीका कर्मचारीको लापरबाहिका कारण मूलको पानी धारा–ट्याङकिमा नभई खोल्सीमा !
धनकुटा तेलियाका इन्द्र बहादुर लिम्बु भन्छन,- धारामा कमिलाको गुँड छ, ट्याङकीमा माकुराको जालो
धनकुटा खबर । १३ बर्ष अघि टोलै पिच्छे धमाधम पानी ट्याङकी र धारा बनेपछि खानेपानीको समस्या टर्यो भनेर खुशीले गदगद् भएका धनकुटाको साविक तेलिया गाविस अहिलेको छथरजोरपाटी गाउँपालिका ४ का बासिन्दा सरकारी धारोमा पानीको थोपो नझरेपछि माछो माछो भ्यागुतो भएका छन् ।
२०५७ सालमा स्थानीय जनतामाझ खानेपानी आपूर्ती व्यबस्थालाई सहज बनाउने भन्दै जिल्ला खानेपानी कार्यालय र भू–तथा जलाधार संरक्षण कार्यालयको आर्थिक प्रविधिक सहयोगमा साविक तेलिया गाविसमा मात्रै ३७ सार्वजनिक धारा र दर्जन बढि ट्याङकि निर्माण भएका थिए ।
अहिले ति धाराबाट पानीको थोपो झदैन । ‘धारामा कमिलाको गुँड छ, ट्याङकीमा माकुराको जालो ।’ स्थानीय इन्द्र बहादुर लिम्बुले बताए । खानेपानीको धारो बनाउन अनिकालको अन्न समेत बेचेर खर्च जुटाईयो धारामा पानी झरेन । अर्का उपभोक्ता रोहिणी बेलास खतिबटाले गुनासो गरे । दुःख गरेर आर्थिक र जनश्रम जुटाएका सर्वसाधारण पानीको उपभोग गर्न नपाए पछि खिन्न बनेका हुन ।
खानेपानीका लागि गाडिएका पाईप ठाउँ–ठाउँबाटै चोरी भएका छन । साविक तेलिया गाविसको मार्से, फँडिरे, पिप्ले, लगायतका स्थानमा खानेपानीको चरम अभाव छ । स्थानीयहरु पानीकै लागि दैनिक लामो समय खर्चन्छन ।
पानीको समस्या समाधानका लागि स्थानीयले पानी मूल खरिदका लागि योजना बनाए पनि महगो लागतका कारण योजनाले मूर्तरुप लिन सकेको छैन भने भूमिगत पानीका मूहान सुकेकाले पनि समस्या भएको स्थानिय बताउछन् । ‘टाढा पानी मूल भेटिएको छ, सबै पैसाको जोहो गर्न स्थानीयको पूँजीले भ्याउँदैन, सहयोग गर्ने निकाय फेला परेन ।’ उपभोक्ता शंकर प्रसाद ओझाले गुनासो गरे ।
तेलिया र तांखुवा गाविसको सीमावर्ती सोतीआहालमा रहेको ट्याङ्कीबाट वितरणको व्यबस्था मिलाईएको भए पनि खानेपानीका कर्मचारीको लापरबाहिका कारण त्यहाँबाट छोडिएको पानी उपभोक्ताका धारा–ट्याङकिमा नभई खोल्सीमा बग्छ ।
