स्वास्थ्य मन्त्रीलाई राजीनामा बुझाएका वीर अस्पतालका प्रा.डा.अधिकारीले ऐन मिचेको तथ्य फेला
काठमाडौं । स्वास्थ्य मन्त्रीलाई राजीनामा बुझाएका वीर अस्पतालका प्राध्यापक डाक्टर ध्रुवराज अधिकारीले ऐन मिचेको तथ्य फेला परेको छ ।
हिजो अधिकारीले चाकडी र घुस दिन नसकेको भन्दै राजीनामा बुझाएका थिए । वीर अस्पतालमा कार्यरत अधिकारीले नेपाल स्वास्थ्य सेवा ऐन विपरित निजी अस्पतालमा समेत काम गरेको पाइएको छ ।
अधिकारीले विनायक, ग्लोबल अस्पताल सहित विभिन्न क्लिनिकमा काम गर्ने गरेको भेटिएको छ । सरकारी अस्पतालमा कार्यरत् कर्मचारीले विना जानकारी निजी अस्पतालमा काम गर्न नपाउने प्रावधान रहेको छ ।
त्यस्तै स्वास्थ्य सेवा ऐनको परिच्छेद ४ मा बढुवा वा पदस्थापन भएको कर्मचारी खटाएको स्थानमा हाजिर हुनुपर्ने व्यवस्था गरेको छ । अधिकारी काठमाडौंका विभिन्न निजी अस्पतालमा कार्यरत् समेत रहेका कारण काठमाडौं बाहिर जान नखोजेको स्वास्थ्य मन्त्रालयको भनाई छ ।
८ औं तहमा कार्यरत् डाक्टर अधिकारीलाई नवौं तहमा बढुवा भएपछि गत चैत १८ गते पोखरामा पदस्थापना गरिएको थियो । वीर अस्पतालमा नवौं तहको दरवन्दी खाली नभएपछि उनलाई पोखरा क्षेत्रीय अस्पतालमा सरुवा गरिएको मन्त्रालयले जनाएको छ । न्यूज २४ नेपाल ।
