धनकुटाका संस्थाहरुको देउसी-भैलोको रकम सामाजिक काममा, हेर्नुहोस कसले के गरे ?
धनकुटा खबर, १२ मंसिर । धनकुटाका बिभिन्न संस्थाहरुले तिहारमा देउसी तथा भैलो कार्यक्रम गरेर संकलन गरेको रकम सामाजिक काममा खर्च गरेका छन् ।
धनकुटा ६ को हाम्रो बहुमूखि पाठशालाले तिहारको अवसरमा देउसीभैलो कार्यक्रमबाट जम्मा गरेको २ लाख ५८ हजार रुपैयाँ विभिन्न जातजातिका भेषभूषा र गरगहना खरिद गर्ने संयोजक सरोज भुजेलले जानकारी दिएका छन् ।
उता धनकुटा ४ देव्रेवासमा रहेको नमूना बाल क्लवका बालबालिकाले देउसीभैलो खेलेर २७ हजार रकम संकलन गरेका छन् । संकलित रकम धनकुटा नगरपालिका ४ मा रहेको मदन स्मृति केन्द्रका द्धन्द्धपीडित असाहाय बालबालिकाहरुका लागि खर्च गरिने बाल क्लवका अध्यक्ष निराकार अधिकारीले बताए ।
यसैगरी किरात संस्कार संस्कृति संरक्षण समिति हिलेले आयोजना गरेको देउसी कार्यक्रबाट १ लाख संकलन गरेको छ । संकलित रकमबाट किरात भाषा संस्कृति क्षेत्रका लागि खर्च गरिने संस्थाका सल्लाहाकार जीवन राईले बताए ।
होटल एशोसिएशन अफ भेडेटारले भवन निर्माण सहयोगका लागि तिहारमा खेलेको देउसीभैलोबाट ३ लाख ४३ हजार रकम संकलन गरेको छ । पर्यटकीय स्थल भेडेटारमा एशोसिएशनले आगामि बैशाखभित्र आफ्नै भवन निर्माण गर्न तिहारको अवसरमा तीन दिन खेलेको देउसीभैलोले सो रकम संकलन गरिएको एशोसिएशनका अध्यक्ष जितेन्द्र रुम्दाली राईले बताए ।
छथरजोरपाटि गाउँपालिका २ स्थित जोरपाटि बजार व्यावस्थापन समितिले तिहारको अवसरमा देउसी भैलो खेलेर संकलित रकमले बजार सरसफाइका लागि डस्वीन खरिद गरेको छ । समितिले आयोजना गरेको देउसी भैलोबाट १ लाख ७ हजार संकलन गरेको समितिका अध्यक्ष योगेन्द्र पुलामी मगरले बताए ।
